İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 403 Hüküm no: 469 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekfurdağın’dan İstanbul’a susam ve yağ getiren esnafın nizamı Helvacılar ile şîr-i revgancı esnâfının Tekfurdağı bağcıları için muhdes olan kârhânelerin men‘ine dâir i‘lâm Ma‘rûz Sâdır olan fermân-ı âlîşâna imtisâlen işbu arzuhâl ve derkenâra ba‘de’n-nazar Âsitâne-i aliyye ve tevâbi‘inde vâki‘ tahin ve şîr-i revgancı esnâfının kethüdâları Numan ve yiğitbaşıları Ahmed ve yarıcıları Salih ve müsin [ve] ihtiyârları Molla Yusuf ve Molla İsmail ve Osman Yazıcı ve Yakub ve re‘âyâdan Nikola ve diğer Nikola ve Acı Yani vesâirleri meclis-i şer‘-i enverde Tekfurdağı kasabasında tahin ve şîr-i revgancı esnâfının şürekâları olup odun kapısı sâkinlerinden İmâmzâde el-Hâc Ahmed ve Seyyid Ahmed ve Mehmed Emin ve Abdurrahman ve Sabuncuzâde es-Seyyid el-Hâc Mustafa ve re‘âyâdan İskerlet ve Peter muvâcehelerinde helvacı esnâfı kethüdâları ve yiğitbaşıları Memiş Ali ve Seyyid İbrahim ve diğer Ali ve Hâfız Abdülkādir ve âhar Ali ve İsmail ve Mehmed vesâirleri hâzır oldukları hâlde kadîmü’l-eyyâmdan beri Tekfurdağı kasabasında beş aded kârhâne olup el-yevm gerek kârhâne ve gerek bakkāl dükkânları derûnlarında ihdâs ve yirmi sekiz ve otuza iblâğ ve ol havâlîde hâsıl olan susamın cümlesini i‘mâl bir mikdârını Âsitâne-i aliyyeye irsâl mâ‘adâsını etrâf-ı eknâfa telef ve zâyi‘ etmeleri gerek Âsitâne sekenesinin muzâyakalarına ve gerek bizlerin perîşan olmamıza bâ‘is ve bâdi olur bir keyfiyet olmağla fîmâ ba‘d beş adedi ibkā mâ‘adâ cümlesini sedd u bend olunup hâsıl olan susam peyderpey Âsitâne-i aliyyeye celb olunmasını istirhâm eylediklerinde şürekâ-i merkūmun istintak oldukda kadîmü’l-eyyâmdan beri kasaba-i mezbûrede Ördeklidere’de Estefan yağhânesi demekle arîf ve mumcu Panayot yağhânesi ve Akçabardakzâde Ali Bey yağhânesi ve Çorluluzâde Abdullah yağhânesi ve Yalakābâdlızâde Süleyman yağhânesi ve Apostol yağhânesi ve araba pazarında Nikola yağhânesi ve kömürcü pazarında Kirpano yağhânesi ve penbe pazarında Zafiri yağhânesi ve Arabacıoğlu yağhânesi ve Ali Şahzâde es-Seyyid Mehmed Emin yağhânesi ve çiftlik önünde kömür pazarında Yanako yağhânesi ki cem‘an on iki bâb yağhâne kadîme olup ve yağhâne-i mezkûrlarda hâsıl olan gerek tahin ve gerek şîr-i revganının bir dirhemi âhar mahalle sarf olmayıp doğru bizlere gelip biz dahi tahini işbu hâzırân bi’l-meclis helvacılara ve şîr-i revgan yağını şirâsına tâlib olan ibâdullâha bey‘le gerek bizler ve gerek ol tarafda şürekâlarımız bu vesîle ile sâye-i Padişâhîde ta‘şîr ederiz deyip hâzirûn-ı mezbûrûn helvacı tâifesi dahi fi’l-hakīka kârhâne-i mezkûrda hâsıl olan emti‘a doğru Âsitâne-i aliyyeye gelip ve bizler dahi külliyetli tahin olup ve bizi ancak ol kârhânelerde hâsıl olan tahin idâre eder ve on iki kârhâne-i mezkûrların men‘ine bizler dahi râzılar değilleriz deyip beyinlerinde ba‘de vukū‘ı’l-münâza‘a beyinleri ıslâh olunup fîmâ ba‘d on iki aded kârhâne-i mezkûrlar ibkā olunup ve kârhâne-i mezkûrlarda hâsıl olan emti‘adan kasaba-i mezbûre sekenesinin muhtâc olduklarından fazlayı peyderpey Âsitâne-i aliyyeye celb ve bir seneden bir seneye kifâyet mikdârdan ziyâde susam der-anbar etmemeğe ta‘ahhüd ve mâ‘adâ muhdes ve bakkāl dükkânları derûnlarında yağhânelerinin men‘ini hâvi Başmuhâsebe’ye kayd ve kasaba-i mezbûre kādısı ve zâbıtına hitâben bir kıt‘a fermân-ı âlî istid‘â ve istirhâm eyledikleri ma‘lûm-ı devletleri buyruldukda müsâ‘ade-i aliyyeleri erzânı buyrulmak husûsu re’y-i âlilerine menût idüğü İslâmbol Mahkemesi’nden huzûr-ı âlîlerine i‘lâm olundu. Fî-24 min C sene [1]217