İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 402 Hüküm no: 468 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anderya v. Mike’nin, alacak davasında Foti v. Aslan’ın zimmetini ibrâ ettiği 1.433 guruş da‘vâsına iltifât olunmayıp 60 guruşa sulh-i ibrâ Ma‘rûz Derûn-ı arzuhâlde mezkûrü’l-ism Foti v. Aslan nâm zimmî Çarşamba günü arz odasından huzûr-ı hazret-i âsafânelerinde ma‘kūd meclis-i şer‘-i enverde arzuhâl eden Anderya v. Mike zimmî muvâcehesinde ben dört sene mukaddem Medîne-i İzmir’den Âsitâne-i aliyyede mersûm Anderya zimmîye on beş balya kâğıdımı irsâl ve tarafımdan bey‘e tevkîl eylediğimde ol dahi zikr olunan kâğıdı kabz ve vekâlet-i mezkûreyi ba‘de’l-kabûl mârrü’l-beyân kâğıdı iki yüz seksen üç guruş yirmi paraya bi’l-vekâle âhara bey‘ ve kabz-ı semen ettikden sonra ben Âsitâne-i aliyyeye gelip rü’yet-i hesâb eylediğimizde semen-i mezkûrdan gümrük ve mesârif-i sâiresi olan cem‘an doksan yedi guruş fürû-nihâde olundukda bâkīsi olan yüz seksen altı buçuk guruşu bana teslîme ben dahi kabz ve ber-vech-i muharrer kabzımı ve meblağ-ı mezbûrdan zimmetinde bir akçe bâkī kalmadığını nâtık yedine mu‘anven Rûmiyyü’l-ibâre bir kıt‘a temessük dahi vermişdim lâkin ol târihde zikr olunan kâğıdın kıymeti bin altı yüz yirmi guruş olmağla makbûzum olan yüz seksen altı buçuk guruşdan kıymet-i mezkûresine varınca iktizâ eden bin dört yüz otuz üç buçuk guruşu dahi mersûm Anderya zimmî bana malından zâmin olsun deyü takrîr-i meşrûhu üzere tasaddî eylediği da‘vâsı meşrû‘a olmamağla kelâmına iltifât olunmayıp lâkin mersûm Anderya zimmî dîvân-ı âlilerinde ma‘kūd meclis-i şer‘de mersûm Foti zimmîye malından altmış guruş teberru‘an def‘ ve teslîm ol dahi ba‘de’l-ahz husûs-ı mezkûra müte‘alika âmme-i da‘vâdan dahi kabûlünü hâvi mersûm Foti zimmînin zimmetini ibrâ-yı âmm-ı sahîh-i şer‘î ile ibrâ ve iskāt eylediği İstanbul Mahkemesi’nden huzûr-ı âlîlerine i‘lâm olundu. Fî-22 min C sene [1]217