İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 438 Hüküm no: 511 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan, Mehmed ve Ahmed isimli kişilerin, sefere katılmadıklarından ücrete müstehak olmadıkları ve ordu-yı hümâyun ağası Mehmed Sâdık Ağa’ya karşı açtıkları alacak davasında muarazadan men edildikleri Na‘lband esnâfıyla ordu ağasının Ma‘rûz Nalbant esnâfından ashâb-ı arzuhâl Hasan Usta ve Ahmed Usta ve Mehmed Usta ve el-Hâc Mehmed Usta nâm kimesneler meclis-i şer‘-i münîrde esnâf-ı merkūme kethüdâsı Osman ve ustalarından Ahmed ve el-Hâc Ali ve el-Hâc Mustafa ve Ebûbekir ve el-Hâc Ahmed ve diğer el-Hâc Mehmed vesâirleri hâzır oldukları hâlde bevvâbîn-i hâssadan ordu-yı hümâyûn ağası derûn-ı arzuhâlde mezkûrü’l-ism Mehmed Sâdık Ağa mahzarında bundan akdem Mısr-ı Kahire’ye ihrâc olunan ordu-yı hümâyûna esnâf-ı merkūmeden bâ-fermân-ı âlî müretteb olan dört hayme ihrâcıyla biz mukaddemâ orducu ta‘yîn olunmamızla bin iki yüz on beş ve on altı senelerinde esnâfımızdan ve gerek esnâfımıza mülhak olan esnâf-ı sâireden cem‘ ve tahsîl olunan senevî bin üçer yüz guruşdan iki senede cem‘an iki bin altı yüz guruşu bize îsâl için mezbûr Mehmed Sâdık Ağa’ya teslîm olunmağla ol dahi ba‘de’l-kabz seneteyn-i merkūmeteynde ancak dört yüz guruş verip mâ‘adâ iki bin iki yüz guruşu yedinde kalmağla taleb ederiz deyü da‘vâ ettiklerinde ordu ağası merkūm cevâbında ber-vech-i muharrer seneteyn-i merkūmeteynde esnâf-ı merkūmenin cem‘ ve tahsîl eyledikleri ol mikdâr guruşu [75a] bâ-fermân-ı âlî esnâf-ı merkūmeden müretteb olan dört hayme ihrâcıyla orducu ta‘yîn-birle edâ-yı hizmet-i lâzıme olunması için bana vermeleriyle ben dahi sefer-i hümâyûnda na‘lbandân-ı mezbûrûndan ancak işbu merkūm el-Hâc Mehmed mevcûd bulunup kabzını mu‘terif oldukları meblağ-ı mezbûru teslîm mâ‘adâsı nâ-mevcûd olmağla mukaddemâ kethüdâ ve ustaları hâzirûn-ı merkūmûnun bana re’y ve siparişleri üzere bedel olarak yerlerine ihrâc-ı hayme ile tedârik ve ihrâc eylediğim kimesnelere verip ol vechile esnâf-ı merkūme taraflarından edâ-yı hizmet-i seferiye ettirmişdim deyip ve hakīkat-i hal ordu ağası mezbûrun takrîr-i meşrûhu üzere olduğunu vukūf-ı tâmları olan sikāt-ı Müslimîn ihbâr ve na‘lbandân kethüdâsı ve ustaları hâzirûn-ı merkūmun dahi tasdîk ve müdde‘ûn-ı mezbûrûn Hasan Usta ve Mehmed Usta ve Ahmed Usta seneteyn-i merkūmeteynde mahâll-i mezbûrda mevcûd bulunmadıklarını ikrâr u i‘tirâf etmeleriyle mûcebince merkūmun Hasan ve Mehmed ve Ahmed’den her biri ücrete müstehak olmayıp ol vechile da‘vâ-yı mezkûreleriyle esnâf-ı mezbûrûna ve ordu-yı hümâyûn ağası mezbûr Mehmed Sâdık’a bî-vech-i şer‘î mu‘ârazadan men‘ oldukları İstanbul Mahkemesi’nden huzûr-ı âlîlerine i‘lâm olundu. Fî-25 min Ca sene [1]217