İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 455 Hüküm no: 531 Orijinal metin no: [78a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Kirkor’un, Sarraf Elmasoğlu Serupa v. Artin’deki alacağı hususunda bedel-i sulh karşılığı anlaştığı Ücretden ve 1.372 guruşdan 500 guruşa sulh Ma‘rûz Arzuhâl eden Mismârî Avanis v. Kirkor nâm zimmî bi’t-terâzi meclis-i şer‘-i münîrde derûn-ı arzuhâlde merkūmü’l-ism Sarraf Elmasoğlu Serupa v. Artin nâm zimmî muvâcehesinde ben ücret ile hizmet eder makūleden olmamla sarraf-ı mersûmun talebiyle ücret kavlinsiz on yedi ay kendiye emriyle müddet-i mezkûrede eylediğim hizmetim için müstehak olduğum ecr-i mislim ile mesfûrun bi-şartü’r-rücû‘ emriyle umûr-ı ma‘lûmesine malımdan harc ve sarf eylediğim cem‘an bin üç yüz yetmiş iki guruşu mersûm Serupa zimmîden taleb ederim deyü tasaddî eylediğim da‘vâmdan bâ-vesâtet-ı muslihîn mersûm Serupa zimmî ile bi’t-tav‘ ve’r-rızâ beş yüz ba‘de akdi’l-musâlahati ve’l-kabûl bedel-i sulh-ı merkūm beş yüz guruşun yüz kırk guruşuna takāsan malından yüz on guruş kıymetli bir sim sa‘at ile otuz guruş kıymetli bir yaldızlı nühas başlık verip ve yüz guruşunu nakden bana teslîm ben dahi kabz edip bâkī kalan iki yüz altmış guruşu ile beni mersûm Serupa zimmî İstanbul’da Topkapı nâm mahalde mütemekkine Sohoma Nasrâniye zimmetinde cihet-i karzdan bâ-temessük alacağı olan iki yüz altmış guruşu medyûnesi Nasrâniye Serupa üzerine üçümüz bir meclisde iken havâle-i mukayyide-i sahîha-i havâle etmekle her birimiz havâle-i mezkûreyi kabûl edip ol vechile ben bedel-i sulh-i merkūm beş yüz guruşu zimmî-i mesfûrdan vech-i meşrûh üzere ahz u istîfâ etmemle mâ‘adâya ve bi’l-cümle husûs-ı mezkûre ve beynimizde cereyân eden sâir cemî‘-i hukūk-ı şer‘iyyeye müte‘allika mutlakan âmme-i de‘âvîden mersûm Serupa zimmînin zimmetini ibrâ-i âmm-ı sahîh-i şer‘î ile kabûlünü hâvi ibrâ ve iskāt eyledim deyü tasdîkleri İstanbul mahkemesinde tescîl ve huzûr âlilerine i‘lâm olundu. Fî-21 min Ş sene [1]217