İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 456 Hüküm no: 532 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. İbrahim’in, Üsküdar’da Kızlarağası Çeşmesi civarındaki tütüncü gediğini Horhor Çeşmesi’ne nakledebileceği Üsküdar tütüncü gediği nakli Ma‘rûz Tütüncü esnâfından Mustafa Çelebi b. İbrahim nâm kimesne meclis-i şer‘-i münîrde tütüncü esnâfının kethüdâsı İbrahim Ağa tarafından mürsel Yiğitbaşı Ali b. Hüseyin ile esnâf-ı mezkûrenin müsin ve ihtiyârlarından mazbûtü’l-esâmî ustalar hâzır oldukları hâlde takrîr-i kelâm ve tâ‘bir ani’l-merâm edip Üsküdar’da Kızlarağası Çeşmesi civârında Papasoğlu Hânı ittisâlinde kâin tütüncü dükkânlarından Ali Ağa’nın müstecir olduğu dükkânın gediği tedâvül-i eyâdî ile bâ-hüccet-i şer‘iyye yedimde mülküm olup lâkin bu makūle tütüncü dükkânlarından birinin mülk sâhibine eşedd-i lüzûmu olduğu takdirce âhar esnâfdan birinin mu‘teber gediği olmayan dükkâna kethüdâ ve ihtiyârlar ma‘rifetleriyle naklolunmak esnâfımızın bâ-fermân-ı âlî nizâm-yâfte-i şürût-ı mer‘iyyelerinden ve dükkân-ı mezkûrun mülk sâhibi olan kimesneye eşedd-i lüzûmu olmağla dükkân-ı mezkûrun gediği mârrü’l-beyân Üsküdar’da kolluk-ı kebîr verâsında Horhor Çeşmesi ittisâlinde kâin menzilim tahtında olan dükkânıma naklolunmak murâdımdır dedikde esnâf-ı mezkûrenin şürûtları mezbûr Mustafa Çelebi’nin takrîr-i meşrûhu üzere olduğunu yiğitbaşı mezbûr ile esnâf-ı mezbûre meclis-i şer‘de haber vermeleriyle hân-ı merkūm civârında olup mülk sâhibine eşedd-i lüzûmu olan dükkân gediği mukayyed olduğu ma‘den kaleminden merkūm Ali Ağa ismine olan kaydı ref‘ ve terkīn ve mârru’z--zikr Horhor Çeşmesi ittisâlinde kâin dükkâna nakl ve merkūm es-Seyyid Mustafa Çelebi üzerine tahrîr ve yedine sûret i‘tâ buyrulmak bâbında istid‘â-yı inâyet eylediği İstanbul Mahkemesi’nden huzûr-ı âlîlerine i‘lâm olundu. Fî-25 min Ş sene [1]217