İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 468 Hüküm no: 546 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Hacı Ali b. Hasan’ın malik olduğu bir bab tütüncü gediğini Molla Ahmed b. Mehmed Emin’e sattığı Tütüncü gediği mübâya‘ası Ma‘rûz Ma‘den kaleminde mukayyed tütüncü gediklerinden İstanbul’da Tahmîs kurbünde Asmaaltında vâki‘ Mahmudpaşa Ömer Ağa dükkânı demekle ma‘lûm bir bâb tütüncü mahzeni derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmenin tedâvül-i eyâdî ile mâliki olan Küçük Hacı Ali b. el-Hâc Hasan nâm kimesne tarafından husûs-ı âtîde vekîl olduğu tütüncü esnâfının kethüdâsı İbrahim Ağa b. Ahmed ve el-Hâc Ahmed b. Hüseyin şehâdetleriyle sâbit olan Molla İsmail b. Osman meclis-i şer‘-i münîrde esnâf-ı mezbûreden Molla Ahmed b. Mehmed Emin muvâcehesinde müvekkilim merkūm Küçük el-Hâc Ali ber-vech-i muharrer mâlik olduğu tütüncü gediği tâ‘bir olunan âlât-ı lâzıme-i merkūmeyi bin üç yüz guruş semen-i makbûza tarafından icab ve’l-kabûl bâtten ve sahîhan merkūm Molla Ahmed’e bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘avîden her biri âharın zimmetini ibrâ ve iskāt ve her biri âharın ibrâsını kabûl etmekle fîmâ ba‘d zikr olunan mahzen derûnunda mevcûde gedik tâ‘bir olunan âlât-ı lâzıme-i mazkûrede müvekkilim mezbûr Küçük el-Hâc Ali’nin kat‘an alâka ve medhali kalmayıp merkūm Molla Ahmed’in mülk-i müşterâsı olmuşdur dedikde ol dahi tasdîk etmeğin zikr olunan mahzen gediği ma‘den kaleminde merkūm Mahmudpaşa Ömer Ağa ismine olan kaydı ref‘ ve ilkā ve merkūm Molla Ahmed üzerine kayd ve tahrîr ve yedine sûret i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-12 min-Şevvâl sene [1]217