İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 467 Hüküm no: 545 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esedoroğlu Palaş ve Yorgi’nin, Aliko v. Dimitri’deki kürk semeninden alaklarını altımış bir gün tecil ettikleri Kürk semeninden bâkī 895 guruş 61 gün te’cîl Ma‘rûz İstanbul’da Mahmudpaşa kurbünde kürkçüler sûkunda mütemekkin kürkçü esnâfından Esedoroğlu Palaş ve Yorgi nâm zimmîler meclis-i şer‘-i münîrde Aliko v. Dimitri nâm zimmî muvâcehesinde mersûm Aliko’nun babası olup Fenerkapısı hâricinde mütemekkin Eczacı Dimitri v. Yani zimmî hâzır olduğu hâlde kürkçiü tâifesinden gāib ani’l-meclis şerîkimiz Esedoroğlu Dimitri nâm zimmînin mersûm Aliko zimmetinde kürk semeninden bin iki yüz otuz beş guruş hakkı olup ve mersûm Aliko bundan akdem diyâr-ı Eflak’da voyvoda hizmetinde olup biz dahi diyâr-ı merkūma râhi olmamız takrîbiyle şerîkimiz mersûm Esedoroğlu Dimitri beynimizde olan hesâbımızın ol mikdârıyla bizi medyûnu mersûm Aliko üzerine havâle edip biz dahi kabûl ve havâle-i mezkûreyi diyâr-ı Eflak’da mesfûr Aliko’ya ifâde ve i‘lâm eylediğimizde ol dahi kezâlik kabûl ve meblağ-ı mezbûr zimmetinde cihet-i merkūmeden bize deyni olduğunu nâtık işbu yedimizde olan Rumiyyu’l-ibâre iki kıt‘a temessükü i‘tâ eylediğinden sonra meblağ-ı mezbûrun üç yüz kırk guruşunu bize edâ ve teslîm etmekle bâkīsi olan sekiz yüz doksan beş guruşu mersûm Aliko’dan hâlâ taleb ederiz deyü da‘vâ ettiğimizde ol dahi ber-minvâl-i muharrer müdde‘âmızı ve meblağ-ı bâkī-i mezbûr sekiz yüz doksan beş guruş el-yevm zimmetinde deyni olduğunu bi-tamâmihî tâyi‘an ve kat‘iyyen ikrâr u i‘tirâf edip ve deyn-i meblağ-ı bâkī-i mezbûr sekiz yüz doksan beş guruşa babası hâzır-ı mesfûr Eczacı Dimitri tarefeynden bi’l-emr ve’l-kabûl kefâlet-i mutlaka-yı sahîha ile kefîl ve zâmin olup meblağ-ı bâkī-i merkūmu târih-i i‘lâmdan altmış bir gün mürûrunda her biri asâleten ve kefâleten edâya müte‘ahhid olmalarıyla biz dahi râzılar olup vech-i meşrûh üzere imhâl ve te’cîl eyledik dediklerini mersûm Aliko ile babası hâzır-ı mersûmdan her biri tasdîk ve ecel-i mezkûr hulûlünde edâya ta‘ahhüd eyledikleri İstanbul mahkemesinde tescîl ve huzûr-ı âlîlerine i‘lâm olundu. Fî-29 Şa‘ban sene [1]217