İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 469 Hüküm no: 549 Orijinal metin no: [81b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Markos v. Avanis’ın, Memiş Beşe b. İsmail’e olan borcunu kabul ettiği ve ödemesi gerektiği 400 guruşu edâya tenbîh Ma‘rûz İstanbul’da Davutpaşa iskelesinde sâkin kömürcü esnâfından derûn-ı arzuhâlde mezkûrü’l-ism es-Seyyid Memiş Beşe b. İsmail meclis-i şer‘-i münîrde arzuhâl eden Tütüncü Markos v. Avanis nâm zimmî muvâcehesinde mesfûr Markos zimmî bundan akdem beynimizde ma‘lûm bir husûsun temşiyeti için işbu hâzır bi’l-meclis Sarraf Arotin v. Samoel zimmî yediyle malımdan rüşvet tarîkiyle bi-gayr-ı hakkın beş yüz guruşumu ahz etmekle istirdâd murâdımdır deyü tasaddî eylediğim da‘vâmdan bâ-vesâtet-ı muslihîn bi’t-tav‘ ve’r-rızâ mersûm Markos zimmî ile dört yüz guruşa ba‘de akdi’l-musâlahati ve’l-kabûl bedel-i sulh-i mezkûrdan mâ‘adâ beş yüz guruşa varınca ziyâdesi olan yüz guruşa müte‘allika da‘vâdan mesfûr Markos zimmînin zimmetini kabûlü hâvi ibrâ ve iskāt eyledim deyü mukırr-ı mezbûrun sâdır olan bi’l-cümle takrîr-i meşrûhu mersûm Markos zimmî tasdîk ve sâlifü’l-beyân ibrâdan müstesnâ bedel-i sulh-i mezkûr dört yüz guruş zimmetinde müdde‘î-i merkūma sahîhan deyni olduğunu kat‘iyyen ve tâyi‘an ikrâr u i‘tirâf etmeğin alâ-mûceb-i i‘tirâfihi meblağ-ı merkūm dört yüz guruşun müdde‘î-i mezbûr es-Seyyid Memiş Beşe’ye bi’t-taleb edâsıyla mesfûr Markos zimmî ilzâm olunduğu İstanbul mahkemesinde tescîl ve huzûr-ı âlîlerine i‘lâm olundu. Fî-12 min-Şevvâl sene 1217