İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 470 Hüküm no: 550 Orijinal metin no: [81b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşlılığı ve hastalığı sebebiyle Halil Ağa b. Mehmed’in kasaplar kethüdalığını kendi rızasıyla İsmail Ağa’ya bıraktığı Nasb-ı kethüdâ-yı kassabân Ma‘rûz Âsitâne-i aliyye ve tevâbi‘i olan bilâd-ı selâsede kâin kassabân-ı ganem esnâfının müsin ve ihtiyâr ustalarından el-Hâc Hâfız Mehmed Emin ve el-Hâc Ahmed ve es-Seyyid İbrahim ve Yusuf ve el-Hâc Osman ve Gedikpaşalı Molla Mustafa ve Mehmed ve el-Hâc Mehmed vesâirleri meclis-i şer‘-i münîrde esnâf-ı mezbûreden bâ‘isü’l-i‘lâm İsmail Ağa b. Mehmed mahzarında her biri takrîr-i kelâm edip beher sene esnâfımızın ihtiyâr ustaları re’yleriyle esnâfımıza müte‘allik vukū‘yâfte olan umûr ve husûslarımızı rü’yet için bir kethüdâ nasb olunmak mu‘tâd-ı kadîm olduğundan mâ‘adâ mukaddemâ kethüdâmız olan es-Seyyid el-Hâc Halil Ağa nâm kimesne dahi bundan akdemce hacc-ı şerîfe azîmet etmekle keff-i yedinden diğer el-Hâc Halil Ağa b. Mehmed nâm kimesne işbu târih-i i‘lâm senesi şehr-i Recebi’l-ferdi evâilinde ma‘rifet-i şerle kethüdâ nasb ve ta‘yîn olunmuşdu lâkin merkūm diğer el-Hâc Halil Ağa zamân-ı nasbından beri hasta ve alîl olup umûr-ı esnâfı rü’yete iktidârı olmadığına binâen kethüdâlık-ı mezkûrdan rızâsıyla keff-i yed etmekle yerine cümlemizin mu‘temed ve muhtarımız olup her vechile kethüdâlık uhdesinden gelmeğe kādir olan mezbûr İsmail Ağa esnâf-ı mezkûra üzerine gurre-i şehr-i mezbûrdan i‘tibâriyle kethüdâ nasb ve ta‘yîn olunması matlûbumuzdur dediklerinde hakīkat-i hâl esnâf-ı merkūme ustaları merkūmûnun takrîr-i meşrûhları üzere olduğu bi’l-ihbâr zâhir ve mütehakkık olmağla cümlesinin marzî ve muhtarları olan mezbûr İsmail Ağa vech-i meşrûh üzere esnâf-ı merkūme üzerine kıbel-i şer‘den kethüdâ nasb ve ta‘yîn olundukda ol dahi kabûl ve hizmet-i lâzımesini kemâl-i sadâkat ve istikāmetle rü’yete ta‘ahhüd ve iltizâm etmekle ber-mûceb-i şürût-ı nizâm merkūm İsmail Ağa’nın kethüdâlığını müekked hüdavendigâr-ı sâbık cennet-mekân firdevs-[âşiyân] merhûm ve mağfûrun leh Sultan Abdülhamid Hân tâbe serâhu evkāf-ı celîleleri mütevellîlerinden yedine temessük i‘tâ olunması iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-14 min-Şevvâl sene [1]217