İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 471 Hüküm no: 551 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapis olan Nikola v. Manol’un, ancak tahliye olduğu takdirde borcunu ödeyecebileceği Ma‘rûz Hâmiş-i arzuhâlde mastûr derkenâr nâtık olduğu üzere bâ-i‘lâm iki bin iki yüz kırk guruş husûsu için üç buçuk aydan beri muhzır ağa tomruğunda mahbûs olup arzuhâl eden Nikola v. Manol nâm zimmî meclis-i şer‘-i hatîrde derûn-ı arzuhâlde mastûrü’l-ism Abanis v. Ananya zimmî muvâcehesinde ben ücret ile dellâl olmamla bundan akdem mesfûr Avanis zimmî benimle altmış guruş ücret-i dellâliye mukāvelesiyle malından seksen altı top Ankara şâlîlerini semen-i misliyle âhara bey‘ için bana teslîm ve bey‘e tevkîl etmekle ben dahi ba‘de kabûlü’l-vekâle zikr olunan şâlîleri kabz ve cem‘an üç bin dört yüz kırk guruşa tüccârdan Doniço v. Diyonisi nâm zimmîye bi’l-vekâle bey‘ ve teslîm ve semen-i mezbûrun bin iki yüz guruşunu müşteri-i mesfûrdan ahz ve mersûm Avanis zimmîye teslîm eylediğim esnâda mukāvele olunan ücret-i merkūmeyi tamamen kabz etmemle semen-i merkūmdan bâkī kalan iki bin iki yüz kırk guruşu tahsîl etmek üzere iken müşteri-i mersûm diyâr-ı âhara firâr ve gaybet etmekle mesfûr Avanis zimmî dahi beni Mahmudpaşa mahkemesine ihzâr ve nâibü’ş-şer‘i’l-kavîm olan es-Seyyid Abdullah Râmiz Efendi huzûrunda husûs-ı mezkûru vech-i meşrûh üzere benden da‘vâ ben dahi müdde‘âsını bi-tamâmihî ikrâr u i‘tirâf edip ücret-i mezkûre ile dellâl ve bey‘e vekîl olup mârru’z--zikr şâlîleri firârî-i mesfûra vekâleten bey‘ ve teslîm eylediğime binâen semen-i bâkī-i mezbûru müşteriden alıver deyü şer‘an cebr olunmak iktizâ eylediğini nâib-i mûmâ-ileyh i‘lâm eylediğine mebni târih-i mezbûrdan beri habs olunmuşdum lâkin müşteri-i firârî-i mesfûr ne mahalde [82a] ve ne mekânda olduğu ma‘lûmum olmamağla zafer bulduğumda semen-i bâkī-i mezbûru mersûmdan alıveririm deyip ve mersûm Avanis zimmî husûs-ı mezkûru tasdîk edip lâkin meblağ-ı bâkī-i mezbûru mersûm Nikoli zimmî malından bana zâmin olsun demesi meşrû‘ olmadığı mesfûr Avanis zimmîye ba‘de’t-tefhîm ancak müşteri-i mersûmdan istîfâ-yı semen etmek üzere mesfûr Nikoli zimmîye habisle cebr olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-23 min-şehr-i Ramazani’l-mübârek sene [1]217