İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 472 Hüküm no: 553 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tuzcular kethüdası Ahmed Ağa b. Mehmed’in, Tuzcu esnaflığından çıkarıldığı Tuzcular kethüdâsı Ahmed Ağa’nın esnâfdan ihrâcı Ma‘rûz Âsitâne-i aliyyede vâki‘ tuzcu esnâfının kethüdâsı sâhib-i arzuhâl el-Hâc Mustafa ve yiğitbaşı İbrahim Yazıcı ve müsinn-i ihtiyârlarından el-Hâc Osman ve es-Seyyid Mustafa Odabaşı ve es-Seyyid Mehmed Çelebi ve Ali Usta ve es-Seyyid Hüseyin Beşe ve Molla Mustafa ve Ömer Usta ve Paşalı Mehmed ve es-Seyyid Derviş Mehmed ve Molla Hüseyin ve Halil Efendi ve el-Hâc Hüseyin ve Molla İbrahim ve es-Seyyid Hasan Beşe ve Süleyman ve Halil Beşe ve es-Seyyid Mustafa ve Ali Beşe ve diğer Molla Mustafa ve Süleyman Usta ve Halil ve Hasan vesâirleri meclis-i şer‘-i münîrde hâlâ tuz emini İsmail Ağa hâzır olduğu hâlde esnâf-ı merkūmenin sâbıkā kethüdâsı derûn-ı arzuhâlde mezkûrü’l-ism Ahmed b. Mehmed mahzarında mezbûr Ahmed esnâfımızdan olup lâkin kendi halinde ırzıyla mukayyed ve kesbiyle meşgūl olmayıp esnâf fukarâsını ve erâmil ve eytâmını gûnâ-gûn tecrîm ve tağrîm ve ta‘cîz ve tekdîr ve beynimizde câri nizâm-ı kadîmimizin ihtilâline bâ‘is ve nizâ‘ ve mücâdeleye bâdi ve beynimizde ilkā-i fesâda sebeb olup bi’d-defa‘ât kendiye tenbîh olundukda kat‘â mütenebbih olmayıp ızrârdan ısrâr üzere olduğundan mâ‘adâ mukāta‘a-i mîrîye-i mezkûre hasılâtının kesr ve tedennîsine bâ‘is olur hâlâta ibtidâr üzere olmağla ol vechile merkūm Ahmed’den emn ve rahatımız bi’l-külliye meslûb olmuşdur deyü işbu bir kıt‘a arzuhâlleriyle iştikâ ve merkūmun harekât-ı nâ-marziyyeye mütecâsir olduğu ve sû-i hâlini muvâcehesinde ihbâr ve fîmâ ba‘d esnâf-ı merkūmeye duhûl etmeyip kesb-i âhara şürû‘ etmek üzere merkūm Ahmed’in esnâf-ı merkūmeden ihrâc olunmasını bi’l-ittifâk istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-18 min-Şevvâl sene [1]217