İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 473 Hüküm no: 554 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvânların Küçük Lanka kolu ile avratpazarı kolunun anlaştıkları Bahçıvânların teklîf ta‘ahhüdü Ma‘rûz İstanbul’da Küçük Lanka kolu tâ‘bir olunur bahçıvân tâifesinden Mehmed Odabaşı nâm kimesne ile yiğitbaşı Onan ve Yorgi ve Rayko ve diğer Onan ve Boğlu ve Tako ve Dilo ve Dilço vesâir zimmîler meclis-i şer‘-i münîrde bahçıvânlar kethüdâsı İsmail Ağa tarafından mürsel vekîli oğlu Ahmed Haseki hâzır olduğu hâlde yine tâife-i merkūmeden ağa hamamı kolu yiğitbaşısı Boğoya ve Dimitri ve Nikola ve Yılan ve Todori ve Esteraz nâm zimmîler ile avratpazarın kolu yiğitbaşısı Dimo ve Vasil ve Aftem ve Mihal ve Yani vesâir zimmîler muvâcehelerinde bizim Lanka tâ‘bir olunan bahçıvânların otuz kıt‘adan mütecâviz bostan ve bahçeleri olmağla bâ-fermân-ı âlî müretteb olan Tersâne-i Âmire’ye zikr olunan üç koldan beher yevm verilegelen on sekiz nefer amelenin nısfı olan dokuz neferi Küçük Lanka kolu bahçıvânları olan bizler ve nısf-ı âharı olan dokuz neferini mârrü’l-beyân ağa hamamı ve avratpazarı nâmıyla olan iki kol bahçıvân tâifesi mezbûrun verip lâkin mezbûrûnun bahçeleri bizden ziyâde olunduğuna binâen beynimizde ta‘dîl ve tesviye-i şürûtuna ri‘âyet-birle iktizâ eden tekâlif-i mezkûre mersûmûn ile beynimizde ale’s-seviyye tevzî‘ ve taksîm olunması murâdımızdır deyü da‘vâ eylediğimde zikr olunan ağa hamamı ve Avratpazarı kolu bahçıvânları mersûmûn dahi cevâblarında eğerçe bizim bostanlarımız otuz beş kıt‘a bostana ve bahçıvânlardan ibâret olup lâkin harâb ve sagīr ve bî-hâsıl olmağla mârru’z--zikr on kıt‘a bahçelerinize mu‘âdil olmadığı zâhir ve bâhir olmağla sizler bizlere husûs-ı mezkûr için imdâd ve i‘ânet eylemeniz matlûbumuzdur deyü bizden da‘vâya tasaddî ve ol vechile beynimizde ba‘de vukū‘ı’l-münâza‘a bâ-vesâtet-ı muslihîn ber-vech-i muharrer külle yevm veregeldiğimiz dokuz nefer ameleyi bizler ve ağa hamamı ve Avratpazarı kolu bahçıvânları dahi ke’l-evvel irsâl eyledikleri dokuz nefer ameleyi sâbıkı vech üzere münâsafaten Tersâne-i Âmire’ye irsâle tarefeynden her birimiz bi’t-tav‘ ve’r-rızâ ta‘ahhüd edip kat‘-ı münâza‘a eyledik deyü ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-13 min-Şevvâl sene [1]217