İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 489 Hüküm no: 577 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davud Çavuş vakfından icareli, menzil davasında Saltana ve Aleknazar v. Artin ile Hanima Nasraniye’nin yüz altmış beş guruşa sulh oldukları Davud Çavuş vakfından menzil da‘vâsından 165 guruşa sulh Ma‘rûz İstanbul’da Samatya nâm mahalde mütemekkinler derûn-ı arzuhâlde isimleri mezkûr Filibos ve kız karındaşları şahısları mu‘arrefe Saltana ve Aleknazar evlâd-ı Artin nâm zimmî ve Nasrâniyeler Çarşamba günü arz odasında huzûr-ı âsafânelerinde ma‘kūd meclis-i şer‘-i münîrde nezâret-i dâ‘îlerinde âsûde evkāfdan merhûm Davud Çavuş vakfı musakkafâtından İstanbul’da Gedikpaşa kurbünde Dîvân-ı âlî Mahallesi’nde Külhan sokağında vâki‘ ma‘lûmü’l-hudûd şehriye yedişer buçuk akçe îcâre-i müecceleli bir bâb menzile bâ-temessük-ı mütevellî bi’l-îcâreteyn mutasarrıfe olan sâhibe-i arzuhâl mu‘arrefetü’ş-şahs Hanime bt. İpek Nasrâniye muvâcehesinde vakf-ı mezbûr mütevellîsi mahalle-i mezbûre Mehmed Nuri b. Zeynelâbidin hâzır olduğu hâlde menzil-i mezkûr babamız mesfûr Artin zimmînin anası ceddemiz Gül Nasrâniyenin bi’l-îcâreteyn taht-ı tasarrufunda iken bin iki yüz iki senesi Rebî‘ulevvel’inin yirmi üçüncü günü ceddemiz mersûme Gül Nasrâniye sağlığında mersûme Hanima Nasrâniye ile zevci Ağya v. Hamberson zimmînin iktirâz ve kabz eylediği üç yüz guruş mukābelesinde her ne zamân meblağ-ı mezbûru edâ ederse redd-i ferağ etmek üzere zevcân-ı mersûmâna ale’l-iştirâki’s-seviyy bâ-re’y-i mütevellî fâriğa olup kable’l-edâ ve’r-red bin iki yüz on senesinde ceddemiz mersûme hâlike oldukda sadrı oğlu babamız peştemalci Artin zimmîye menzil-i mezkûr âdiyen intikāl edip lâkin meblağ-ı merkūmun vermek müyesser olmaksızın bin iki yüz on bir senesinde babamız mesfûr Artin dahi hâlik olmağla menzil-i merkūm âdiyen bize intikāl etmekle meblağ-ı merkūm üç yüz guruşu yedimizden ahz-birle menzil-i merkūmdan bâ-re’y-i mütevellî kasr-ı yedine mesfûre Hanime Nasrâniye’ye tenbîh olunmak murâdımıdır deyü da‘vâ eylediğimizde ol dahi cevâbında menzil-i merkūma mutasarrıfe olan mersûme Gül Nasrâniye târih-i mezbûrda sağlığında benimle zevcim mersûm Ağya zimmîden karz aldığı üç yüz guruş mukābelesinde menzil-i merkūmu ale’l-iştirâki’s-seviyy benimle zevcim mesfûre bâ-re’y-i mütevellî fâriğa oldukdan sonra kable’l-edâ ve’t-tahlîs mesfûre Gül Nasrâniyenin helâkinden mukaddem oğlu babanız mersûm Artin hâlik olup ba‘dehû mesfûre Gül Nasrâniye dahi bilâ-veled hâlike olmağla ol vechile menzil-i merkūm mahlûl ve cânib-i vakfa aid olmağla ol târihde vakf-ı mezbûr mütevellîsi olan Zeynelâbidin nâm kimesne üç yüz elli guruş mu‘accele-i makbûza ve îcâre-i müeccele-i kadîme-i mezkûresiyle taraf-ı vakıfdan bi’t-tevliye benimle zevcim mesfûre ma‘an îcâr ve teslîm biz dahi ba‘de’l-istîcâr ve’l-kabûl zevcim mesfûr Ağya zimmî dahi hâlik olup nısf-ı menzil-i mezkûr sulbî kebîr oğlu Nişan zimmîye âdiyen intikāl etmekle mesfûr Nişan zimmî dahi nısf-ı menzil-i mezbûru bâ-re’y-i mütevellî bana ferağ ve kasr-ı yed etmekle ol vechile menzil-i mezkûru zabt ve tasarruf ederim deyip babamız mersûm Artin zimmînin helâkı ceddemiz mesfûre Gül Nasrâniyenin helâkinden sonra olduğunu ve menzil-i merkūma istihkākını ve ba‘dehû ber-vech-i meşrûh bi’l-intikāl bizim istihkākımızı inkâr ve ol vechile beynimizde ba‘de vukū‘ı’l-münâza‘a mesfûre Hanima Nasrâniye kat‘an li’n-nizâ‘ malından teberru‘an her birimize elli beşer guruşdan cem‘an yüz altmış beş guruş verip biz dahi ahz u kabz edip menzil-i mezkûra ve bi’l-cümle hukūk-ı şer‘iyyeye müte‘allika âmme-i de‘avîden mersûme Hanıma Nasrâniyenin zimmetini şürût-ı müfside ve uhûd-ı mübtileden âri ve cebr ve kerhden hâli ibra-i âmm-ı sahîh-i şer‘î ile kat‘iyyen ibrâ ve iskāt eylediğimizde ol dahi ibra-i mezkûrumuzu kabûl edip ve mütevellî-i hâzır-ı mezbûr mesfûre Hanima Nasrâniyenin tasarrufunu re’y edip bu vechile kat‘-ı münâza‘a eyledik deyü tarefeynin ikrâr ve tasdîkleri İstanbul mahkemesinde tescîl ve huzûr-ı âlîlerine i‘lâm olundu. Fî-24 min-Şevvâl sene [1]217