İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 490 Hüküm no: 578 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Veliyüddin’in, kendisini ölünceye kadar bakmak şartıyla Seyyid Ali b. Ali’ye verdiği evini geri aldığı Menzil ferağı geriye red ve teslîme tenbîh Ma‘rûz Mübârek rikāb-ı kamer-tâb-ı hüsrevâneye takdîm-i arzuhâl eden mu‘arrefetü’z-zât Safiye bt. Veliyüddin nâm Hatun Çarşamba günü arz odasında huzûr-ı âsafânelerinde bi’l-ma‘iyye rü’yete me’mur Haremeyn-i Muhteremeyn müfettişi müderrisîn-i kirâmdan Faziletlü Mehmed Atâullah Efendi hâzır olduğu hâlde akd olunan meclis-i şer‘-i münîrde derûn-ı arzuhâlde mezkûrü’l-ism Yağcı es-Seyyid Ali b. el-Hâc Ali ile zikri âtî menzile müstakilleten mutasarrıfe olan Şehriban bt. Mustafa b. Abdullah nâm Hatun tarafından husûs-ı âtîde vekîl olduğu zâtını ârifân Attârzâde Mehmed Emin Çavuş b. Abdullah ve Mustafa b. Hüseyin şehâdetleriyle sâbit olan Bostanî Mehmed b. Mustafa muvâcehelerinde Haremeyni’ş-şerîfeyn mütevellîsi Hâcegân-ı Dîvân-ı Hümâyûndan İzzetlü Osman Efendi tarafından mürsel vekîli Mehmed Kazım Efendi b. Mustafa hâzır olduğu hâlde vakf-ı şerîf-i mezbûr musakkafâtından İstanbul’da Ahırkapı kurbünde İshakpaşa Mahallesi’nde kâin şehriye on beş akçe îcâre-i müecceleli müfrez bir bâb menzil bâ-temessük-ı mütevellî bi’l-îcâreteyn taht-ı tasarrufumda iken bin iki yüz on altı senesi Rebî‘ülevvelinin on dokuzuncu günü ben fakīre ve alîle ve ihtiyâre olmamla menzil-i mefrûz-ı mezkûru beni ölünceye değin görüp gözetmek şartıyla bâ-re’y-i mütevellî mezbûr es-Seyyid Ali’ye fâriğa olduğumdan sonra müvekkile-i mezbûre Şehriban Hatun’a cihet-i karzdan beş yüz guruş deynim olmağla merkūm es-Seyyid Ali menzil-i mezkûru ber-vech-i muharrer kendiye fâriğa olduğuma binâen deyn-i mezkûrunu ben malımdan veririm deyü menzil-i merkūmu işbu târih-i i‘lâm senesi Cemâziyelâhiri’nin on birinci günü dâyînem müvekkile-i merkūme Şehriban Hatun’a meblağ-ı mezbûr beş yüz guruş mukābelesinde bâ-re’y-i mütevellî fuzûlî fâriğ olup lâkin fi’l-hakīka meblağ-ı merkūm beş yüz guruş müvekkile-i mezbûreye benim deynim olup ve şürût-ı mezkûr ile mezbûr es-Seyyid Ali’ye olan fâriğim şer‘an sahîh olmayıp ve mezbûrun dahi müvekkile-i mezbûre Şehriban Hatun’a ferağında benim icâzetim olmamağla meblağ-ı merkūm beş yüz guruşu yedimden ahz-birle menzil-i merkūmdan kasr-ı yedine müvekkilesi mezbûre Şehriban Hatun’a izâfetle vekîl-i merkūm Ahmed’e tenbîh ve merkūm es-Seyyid Ali’nin ferağ-ı mezkûra binâen bî-vech müdâhalesi men‘ olunmak matlûbumdur deyü da‘vâ ettikde vekîl-i mezbûr Bostanî Ahmed cevâbında müdde‘iye-i merkūme Safiye Hatunu da‘va-yı mezkûresinde bi’l-vekâle tasdîk ve mezbûr es-Seyyid Ali cevâbında menzil-i müfrez-i mezkûr müdde‘iye-i merkūme Safiye Hatun’un bi’l-îcâreteyn taht-ı tasarrufunda malımdan kendiye verdiğim bin yedi yüz guruş bedel mukābelesinde menzil-i merkūmu kat‘iyyen bana fâriğa olup ben dahi meblağ-ı merkūm beş yüz guruş mukābelesinde müvekkile-i merkūme Şehriban Hatun’a fâriğ olmuşdum deyip şart-ı mezkûru inkâr ve ber-minvâl-i muharrer malımdan mezbûre Safiye Hatun’a bin yedi yüz guruş verdim istirdâd ederim deyü eylediği da‘vâsına ikāmet-i beyyineden ızhâr-ı acz eyleyip tahlîfe dahi tâlib olmamağla mezbûr es-Seyyid Ali meblağ-ı merkūm mütâlebesiyle bilâ-beyyine mu‘ârazadan ba‘de’l-men‘ müdde‘iye-i mezbûre Safiye Hatun ferağ-ı merkūm şart-ı mezkûr ile olduğunu lede’t-tezkiye adl ve makbûlü’ş-şehâde idükleri ihbâr olunan mahalle-i mezbûre ahâlîsinden ve bevvâbîn-i hâssadan es-Seyyid Mustafa b. es-Seyyid Hüseyin ve es-Seyyid Osman b. es-Seyyid İsmail şehâdetleriyle arz odasında huzûr-ı âsafânelerinde merkūm es-Seyyid Ali ve vekîl-i merkūm Bostanî Ahmed ve mütevellî vekîli hâzır-ı mezbûr muvâcehelerinde vech-i vecih-i şer‘î üzere isbât etmeğin mûcebince meblağ-ı mezbûr beş yüz guruşu müvekkile-i mezbûre Şehriban Hatun için vekîl-i mezbûra bi’t-taleb edâ-birle menzil-i müfrez-i mezkûru bâ-re’y-i mütevellî müdde‘iye-i merkūme Safiye Hatun’a ferağ ve kasr-ı yed etmek üzere müvekkile-i merkūmeye izâfetle vekîl-i mezbûr Bostanî Ahmed’e tenbîh ve mezbûr es-Seyyid Ali’nin menzil-i merkūma bî-vech müdâhalesi men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî-24 min-Şevvâl sene [1]217