İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 539 Hüküm no: 632 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Yenibahçe kolu bahçıvânlarının teklifi Bahçıvânların teklîf nizâ‘ı men‘i Ma‘rûz İstanbul’da Yenibahçe kolu tâ‘bir olunan bahçıvân tâifesinin yiğitbaşısı Taso ve ustalarından Comil ve Kosta ve Lazo ve Hristo ve Angeli ve Kalib ve diğer Kosta ve Aleksi ve Petro ve Tanaş ve Dilo ve Yorgi ve Dilo vesâir cerîdede mazbûtü’l-esâmî zimmîler meclis-i şer‘-i hatîrde yine zikr olunan Yenibahçe kolu bahçıvânlarından Mihâlâki ve Yorgi ve Anton ve Hristo ve diğer Yorgi ve Dimitri ve âhar Yorgi ve Kosta vesâirleri muvâcehelerinde bahçıvânlar kethüdâsı İsmail Ağa tarafından mürsel vekîli oğlu Ahmed Haseki hâzır olduğu hâlde bâ-evâmir-i aliyye Tersâne-i âmire’de istihdâm için verdiğimiz amele ücretleri vesâir tahsîn-i emlâk için nâzile olan tekâlifi beynimizde bahçelerimize ve mülklerimiz olan gediklerimize göre ta‘dîl ve tesviye-i şürûtuna ri‘âyet olunarak tevzî‘ ve taksîm olunmak îcâb eder iken mesfûrûn Mihâlâki ve Anton ve Yorgi ve Hristo vesâirlerinin bizim bahçelerimize nisbetle bahçeleri ma‘mûr ve vüs‘atli ve gediklerinin kıymetleri bizim bahçelerimiz gedikleri kıymetlerinden ezyed ve hâsılâtı evfer olduğuna binâen hâl ve tahammüllerine göre ta‘dîl ve tesviye-i şürûtuna ri‘âyet lâzıme-i hâlden iken bahçelerin aded-i ruûsuna nazaran ale’s-seviyye veririz deyü bahçelerine göre ta‘dîl ve tesviye-i şürûtuna ri‘âyetden ibâ vü imtinâ‘ etmeleriyle mümâna‘atları men‘ olunmak matlûbumuzdur dediklerinde onlar dahi cevâblarında mesfûrûnu tasdîk edip lâkin birkaç seneden beri bahçelerimizin aded-i ruûsu hesabı üzere ale’s-seviyye verilegelip binâen aleyh yine ale’s-seviyye veririz demeleri müvecceh olmamağla iltifât olunmayıp vech-i meşrûh üzere tahsîn-i emlâk için nâzile olan tekâlifi tarefeynden her birinin bahçeleri ve mülkleri olan gediklerine göre çekmek lâzım olduğu kendilere tefhîm ve ol vechile beynlerinde ta‘dîl ve tesviye-i şürûtuna ri‘âyet olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-28 Za sene [1]217