İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 543 Hüküm no: 637 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz Hacı Mehmed Mescid-i şerifi Vakfı’nın eski mütevellîsi Abdurrahim Efendi b. Abdurrahman’ın, mütevelliliğe yeniden tayini talebinin reddedildiği Seferikoz Vakfı’nın tevliyet ibkāsı Ma‘rûz İstanbul’da Cibali nezdinde ashâb-ı hayrattan merhûm Seferikoz el-Hâc Mehmed mescid-i şerîfi vakfının sâbıkā mütevellîsi sâhib-i arzuhâl Hâfız Abdurrahim Efendi b. el-Hâc Abdurrahman Çarşamba günü arz odasında huzûr-ı âsafîde ma‘kūd meclis-i şer‘-i münîrde vakf-ı merkūmun hâlât bâ-berât-ı âlişân mütevellîsi derûn-ı arzuhâlde mezkûrü’l-ism es-Seyyid Mustafa b. es-Seyyid Hasan nâm kimesne mahzarında tevliyet-i merkūme bin yüz seksen iki târihinden iki yüz on altı senesine gelince otuz dört sene bâ-berât-ı âlî tasarrufumda iken mahalle-i merkūme ahâlîsinden birkaç nefer müfsid garaza mebni câmi‘-i şerîfin tulumba ve musluk ve memşâlarını ta‘mîr etmiyor deyü hilâf-ı vâki‘ ihbârlarına mebni tevliyet-i merkūme üzerimden ref‘ olunmağla vakf-ı merkūma hizmet ve sadâkatim mahalle-i merkūme ahâlîsinden istihbâr buyrulup tevliyet-i merkūme sâhib-i evveli olduğuma binâen mezbûr es-Seyyid Mustafa’nın ref‘inden bana tevcîh buyrulması matlûbumdur deyü da‘vâ ve arz odasında def‘a-i sânîye terâfu‘larında mârru’z--zikr Seferikoz Mahallesi İmâmı es-Seyyid Mustafa Efendi ve Müezzin Hâfız Mustafa ve ahâlîsinden Hoca Ahmed Efendi ve Koltukçu Halil ve Kazgancıbaşı İsmail Ağa ve Kazgancı Mehmed ve Osman Kethüdâ ve Kömürcü Abdurrahman ve Taşçı Mehmed ve Yağcı Ahmed ve Doğramacı Mustafa ve Taşçı Ali ve Ketancı Osman ve Kapanlı Hasan ve Arpacı Süleyman ve Yağcı el-Hâc Mahmud ve Kuruyemişçi İbrahim ve Oturakçı Abdurrahman ve diğer Taşçı Ali ve Na‘lband Veliyüddin ve Yağcı Mehmed ve Mizancı Süleyman ve Kâtib Süleyman ve Attâr Ahmed ve Kâtib Abdi ve Kâtib Mehmed Emin ve Yorgancı Hasan ve Yorgancı Ahmed ve Kantarcı Halil ve Kantarcı Mehmed ve Yağcı Halil nâm cem‘an otuz neferden mütecâviz cema‘at-i Müslimîn mütevellî-i sâbık müdde‘î-i merkūmun mütevellî olduğu müddet-i merkūmede vakf-ı merkūme gûnâ-gûn hayatını ve câmi‘-i merkūmda edâ-yı salât-ı mefrûza derece-i ta‘tîle resîde ve vakf-ı merkūm düyûn-ı vefîreye giriftâr olup işbu hâlâ mütevellî olan es-Seyyid Mustafa mütevellî olduğu müddet-i kalîlede vakf-ı merkūmun iktizâ eden mahallerini müceddeden ta‘mîr ve termîm ve düyûnunu edâ ve vakf-ı merkūm için müceddeden beş bâb menâzil dahi iştirâ ve vezâyif-i mürtezikayı dahi îfâ ettikden sonra vakf-ı merkūmun der-sandık bir mikdâr akçe fazlası dahi vardır deyü mütevellî-i sâbık merkūmun ber-vech-i muharrer tevliyet-i merkūmeye ehil olmayıp hıyâneti zâhir ve bâhir olduğunu gûnâ-gûn sû-i hâlini ve hâlâ mütevellî olan merkūm es-Seyyid Mustafa’nın her vechile sadâkat ve istikāmet ve vakf-ı merkūmun ihyâsına bâdi olduğunu bi’l-muvâcehe alâ-tarîkı’ş-şehâde ihbâr etmeleriyle bu misillü hıyâneti zâhir olan mütevellînin ibkāsı meşrû‘ olmamağla merkūm es-Seyyid Mustafa’ya tevliyet da‘vâsıyla bî-vech mu‘ârazadan men‘ olunup tevliyet-i mezkûre kemâkân mezbûr es-Seyyid Mustafa’nın uhdesinde ibkā ve vech-i meşrûh üzere kaleminde kaydı bâlâsına şerh verilmek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-29 min Za sene [1]217