İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 544 Hüküm no: 638 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bezzâz esnafının nizamı için ferman talebi Bezzâz esnâfına dâir i‘lâm Ma‘rûz Âsitâne-i aliyyede bezzâzistân civârında ve sırt hamamı kurbünde vâki‘ bezzâz esnâfının yedlerinde iken bi-kazâillâhi te‘âlâ zâyi‘ ve başmuhâsebeden hâmiş-i arzuhâle derkenâr olunup tecdîdini iltimâs ve istid‘â eyledikleri nizâmlarını hâvi fermân-ı âlîşân kaydı bâlâsına dîvân-ı hümâyûn kalemi derkenârı mûcebince keyfiyeti i‘lâm eyleyesiz deyü bu dâ‘îlerine hitâben şeref-efzâ-yı sudûr olan fermân-ı âlîlerine imtisâlen derkenâra ve bâ-husûs men‘-i inhisâr bey‘ ve şirâyı muhtevî şeref-yâfte-i sudûr olan hatt-ı hümâyûn-ı şevket-makrûna nazar olundukda havâyic-i zarûriyyeden olup vaktiyle bulunmaması ibâdullâha muzır olan şeylerden don yağı gibi ve onun emsalinin nizâmı dursun ibâresi münderic olup tecdîdi istid‘â olunan işbu emr-i âlîde muharrer bezzâz esnâfının bey‘ eyledikleri emti‘a eğerçe havâyic-i zarûriyyeden olmayıp lâkin herkes dilediği gibi bey‘ u şirâ eylediği takdirce evvelâ tüccârın emvâlini muhâfaza mümkün olmayıp nâ-halef ve mechûlü’l-ahvâl kimesneler ahz-birle bi’l-külliye telef olup gadri mûceb olacağı ve ba‘zı hîle ve fesâd erbâbı ve muhtekir tâifesi ve Yahûdilerden dellâl ve simsar makūleleri kalb ve redî ve teli mu‘tâddan noksan ve zirâ‘ı nâkıs ve boyası has olmayan emti‘ayı ibâdullâha bey‘ ve gûnâ-gûn ızrâr edecekleri âşikâr olduğundan başka bu takrîb muhtekir tâifesi dilediği kadar külliyetli emti‘ayı ahz ve gāli bahâ ile bey‘ ve bunun emsâli nice fesâdı mûceb idüğü bedîhî ve emr-i şerîf-i mezkûrun tecdîd ve mazmûn-ı münîfi ile amel ve ibâdullâhı hasardan muhâfaza sûretinde olmağla tecdîdi husûsu irâde-i aliyyelerine menût olduğuna mebni re’y-i rezîn-i isâbet-makrûnlarına ihâle olunduğu İstanbul Mahkemesi’nden huzûr-ı âlîlerine i‘lâm olundu.- Fî-gurre-i Zilhicce sene [1]217