İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 546 Hüküm no: 640 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İflas eden Yasef v. Ananya’nın sahip olduğu mülk ve gediklerinin satılarak esnafa olan borçlarının ödenmesi Medyûn bakkāl i‘lâmı Ma‘rûz İstanbul’da Fatih Sultan Mehmed Hân Cami‘-i şerîfi kurbünde Küçükkaraman’da vâki‘ Hacı Mustafa dükkânı demekle ma‘lûm bakkāl dükkânında mütemekkin olup bu esnâda düyûn-ı kesîreye ibtilâsı sebebiyle firâr üzere iken ahz u ihzâr olunan bakkāl tâifesinden Yasef v. Ananya nâm zimmînin dâyînlerinden tüccâr tâifesinden revgan ve asel semenleri olmak üzere yüz bir guruş on sekiz para iddi‘â eden kasab damadı Mustafa b. el-Hâc Ali ve peynir semeninden on yedi guruş iddi‘â eden Odunkapılı Tokâdî Mehmed b. İsmail ve pirinç semeninden iki yüz kırk üç guruş on altı para iddi‘â eden Bursalı Molla Mustafa b. Süleyman ve asel semeninden altmış beş guruş yirmi yedi para iddi‘â eden Kurşunlu mahzenli es-Seyyid Mehmed ve pekmez semeninden seksen bir guruş dört para iddi‘â eden Hacı Mustafa ve yine asel semeninden yüz on sekiz guruş yirmi üç para iddi‘â eden Odunkapılı Çamurcu Mehmed ve peynir semeninden yüz otuz guruş on dört para iddi eden Çerağoğlu Ahmed ve yine pekmez semeninden seksen bir guruş iddi‘â eden Hüseyin ve pirinç semeninden seksen sekiz guruş otuz beş para iddi‘â eden Avanozlu Ahmed Yazıcı ve sabun semeninden otuz üç guruş iddi‘â eden Yusuf Beşe ve kuruyemiş semeninden yirmi sekiz guruş iddi‘â eden Mehmed ve mum semeninden altmış guruş iddi‘â eden Tavşan Ömer ve mercimek ve nohud semeninden on beş buçuk guruş iddi‘â eden Mehmed b. el-Hâc Mustafa ve revgan-ı zeyt semeninden seksen iki guruş on dört para iddi‘â eden el-Hâc Mehmed Emin nâm kimesneler ile revgan-ı sâde semeninden yüz elli dört buçuk iddi‘â eden İsbir v. Kaplan ve yine revgan-ı sâde semeninden yüz yirmi sekiz guruş otuz sekiz para iddi‘â eden Riga ve yine revgan-ı sâde semeninden yedi yüz elli dört guruş otuz altı para iddi‘â eden lefter ve pirinç semeninden yirmi bir guruş on üç para iddi‘â eden estati ve şa‘riye semeninden yetmiş beş guruş iddi‘â eden Dimitri ve revgan-ı zeyt semeninden seksen buçuk guruş iddi‘â eden Nikola nâm zimmîler meclis-i şer‘-i münîrde bakkālân pazarbaşısı Süleyman Ağa ve bölükbaşı es-Seyyid Ahmed ve nizâm ustaları hâzır oldukları hâlde bakkāl-ı mesfûr Yasef zimmî muvâcehesinde her biri vech-i meşrûh üzere taleb ve da‘vâ ettiklerinde ol dahi cevâbında kaziyye minvâl-i meşrûh üzere olup cem‘an iki bin üç yüz altmış bir guruş yirmi sekiz para müdde‘ûn-ı mezbûrûna zimmetinde sahîhan deyni olduğunu tâyi‘an ve kat‘iyyen ikrâr u i‘tirâf etmeğin alâ-mûceb-i i‘tirâfihi meblağ-ı mecmû‘-ı mezkûrun vech-i meşrûh üzere edâsıyla ilzâm olundukdan sonra dükkân-ı mezkûrda mevcûd olan zehâir-i ma‘lûme zimmî-i mesfûre hâzır olduğu hâlde ma‘rifet-i şer‘le mu‘âyene ve erbâb-ı vukūf ihbârlarıyla takdîm olundukda mâl-ı mevcûdu iki yüz kırk beş guruşa bâliğ olup bâ-defter zimemâtım vardır deyü ibrâz eylediği defterde olan alacağı mümteni‘ü’l-husûl kabîlinden olduğu münfehim olup ve tüccârın yedlerinde olan tuğralı fermân-ı âlîşân mantûkunca emvâl-i tüccârı telefden sıyâneten bu makūle mâl-ı tüccârı ekl ve bel‘ kasdıyla düyûn-ı vefîreye giriftâr olanların yedlerinde mülkleri olan gedikleri mal-ı tüccâra mukābil olduğu mazmûn-ı fermân-ı âlîşândan müstefâd olmağla zimmî-i mesfûrun müstakillen yedinde mülkü olan gedik-i mezkûru rızâsıyla bey‘ ve semeninden îfâ-yı deyn eder ise fe-bihâ inâden bey‘ etmeyip ibâ vü imtinâ‘ eylediği takdirce gedik-i mezkûr pazarbaşı ve nizâm ustaları ma‘rifeti ve ma‘rifet-i şer‘le semen-i misliyle âhara bey‘ ve semeninden ber-mûceb-i şürût-ı nizâm tüccâr-ı merkūmuna olan düyûn-ı mezkûresi edâ olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-3 min-Zilka‘de sene [1]217