İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 545 Hüküm no: 639 Orijinal metin no: [97a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Abdullah’ın vârislerinin, Sultan Abdülhamid Han vakfından icareli bir bab kasap dükkânı gediğinin yarım hissesini Mehmed Tahir b. Ahmed’e sattıkları Kasab Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân <> —tâbe serâhu— evkāf-ı şerîfe müstegallâtından olup İstanbul’da Yedikule hâricinde leb-i deryâda kâin gayrı-ez selhhâne mîrî olan aded-i ganem selhhânelerinden birinci selhhâneye merbût kasab dükkânlarından mahrûse-i Galata’ya muzâfe kasaba-i Kasımpaşa’da Cumapazarında köprü üstünde çeşme karşında kâin bir bâb kasab dükkânı derûnunda mevcûde beyne’l-esnâf [97b] gedik tâ‘bir olunan âlât-ı lâzıme-i ma‘lûmenin nısf-ı şâyi‘ine babası Ali Beşe b. Abdullah fevtinden bi’l-intikāl mutasarrıf olan sulbî kebîr oğlu Hüseyin nâm kimesne asâleten ve rub‘-ı şâyi‘ine kezâlik babası el-Hâc Mustafa b. Hasan’ın fevtinden bi’l-intikāl mutasarrıfe olan sulbiye-i kebîre kızı mu‘arrefetü’z-zât Hatice nâm Hatun dahi asâleten ve rub‘-ı şâyi‘-ı âharına kezâlik babası müteveffâ-i mezbûr el-Hâc Mustafa’nın fevtinden bi’l-intikāl mutasarrıfe olan sulbiye-i sagîre kızı Emine’nin vâlidesi ve min-kıbeli’ş-şer‘ mansûbe vasîsi mu‘arrefetü’z-zât Hanife bt. Ömer nâm Hatun vesâyeten meclis-i şer‘-i münîrde hâlâ kasabbaşı ser-bevvâbîn-i dergâh-ı âlî İzzetlü Mustafa Ağa tarafından mürsel kasablar kethüdâsı İsmail ve ustalarından el-Hâc Hâfız Mehmed Emin ve el-Hâc Osman vesâirleri hâzır oldukları hâlde kasab ustalarından bâ‘isü’l-i‘lâm el-Hâc Mehmed Tahir b. Ahmed muvâcehesinde her biri bi’l-asâle ve bi’l-vesâye takrîr-i kelâm edip ber-vech-i muharrer bizimle sagīre-i mezbûrenin mutasarrıflar olduğumuz gedik tâ‘bir olunan âlât-ı lâzıme-i ma‘lûmeyi bâ-mesûğ-ı şer‘î el-yevm bedel-i misli idüğü bi’l-ihbâr mütehakkık olunan bin yüz guruş bedel mukābelesinde mezbûr el-Hâc Mehmed Tahir’e bâ-re’y-i mütevellî her birimiz bi’l-asâle ve bi’l-vesâye ferağ ve kasr-ı yed bedel-i merkūmun beş yüz elli guruşunu ben ve iki yüz yetmiş guruşunu müzbûre Hatice ve iki yüz yetmiş beş guruşunu dahi sagīre-i mezbûre için vasîsi vâlidesi mezbûre Hanife Hatun’dan her birimiz kabz edip ba‘de’l-yevm gedik tâ‘bir olunan âlât-ı lâzıme-i mezkûrede bizim ve sagīre-i mezbûrenin kat‘an alâka ve medhali kalmayıp mezbûr el-Hâc Mehmed Tahir’in dâhil-i havza-i tasarrufu olmuşdur dediklerinde ol dahi tasdîk etmeğin âlât-ı lâzıme-i merkūme mezbûrûnun ber-vech-i muharrer ferağlarından mezbûr el-Hâc Mehmed Tahir üzerine defter-i vakfa ba‘de’l-kayd hâmiş-i temessüke tahrîr ve temhîr olunmasını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-2 Zilhicce sene [1]217