İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 548 Hüküm no: 642 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurban bayramında cami ve mescit minarelerinde kandil yakılması Îd-i edhâ kanâdil i‘lâmı Ma‘rûz Dergâh-ı felek-bünyân ve bârgâh-ı asumân unvânlarına ma‘rûz-ı dâ‘î-i şâkirü’l-ihsânlarıdır ki târih-i hicret-i eşref evlâd-ı Hazret-i Halil ve İsmail aleyhim ve alâ-âlihim etemme’t-teslîm mine’l-kerîmi’l-Celîl efendimiz hazretlerinin işbu bin iki yüz on yedi senesi gurre-i şehr-i Ramazani’l-mübârek yevm-i sebtinden olduğu şer‘an sâbite olup sene-i mezbûre hilâl-i Şevvâl ve Zilka‘de bi’r-rü’ye sâbit olmayıp ve îd-i edhânın sübûtu îd-i fıtır gibi olup eyyâm-ı şitâda havada özür mütehakkık olmağla Zilhicceti’ş-şerîfe gurresi nisâb-ı şehâdet ile sübût-ı şer‘îye mütevakkıfe olup elân sübûte olmamağla şuhûr-ı mezkûreden her biri selâsin ile itmâm ve mâh-ı mübârek Zilhicceti’ş-şerîfe yevm-i Cuma evvel-i i‘dâd-ı eyyâm olmak iktizâ etmekle dokuzuncu sebt yevm-i arefe-i mağfiret-hedâyâ ve ferdâsı yevm-i ehad îd-i edhâ-yı meyâmin-i mutâyâ olup leyle-i mübâreke îd-i şerîf ihtirâm ve ibâd-ı Müslimîne i‘lân ve ifhâm için cânib-i seniyyü’l-menâkıb devlet-i aliyyeden kāmet-dilârâ-yı minârâta dîbâ-yı zerrîntâr-ı kanâdil ile ilbâs-ı hil‘at ve bu vechile cümle ehl-i imân vâsıl-ı Kabe-i safa ve meserret kılınmak deydene-i hasene-i saltanat-ı seniyyeden olup bir kā‘ide-i devlet-i aliyye-i ebed-müddet müddallâhu zılâle azametihâ ale’l-arzeyn mâdâreti’s-semâvâti ve irtefe‘at ol leyle-i mübârekede ve türbe-i müstahsene-i mezkûrenin alâ-mâ cera’l-âde icrâsına izin ve ruhsat-ı sâmîleri erzânı buyrulur ise ol bâbda fermân-ı cihan-mutâ‘ları sudûru iktizâ eylediği İstanbul Mahkemesi’nden pîşgâh-ı melâik-mutâflarına i‘lâm olundu bâkī emr u fermân li-hazret-i veliyyü’n-ni‘meti ve’l-ihsân. Fî-2 Za sene [1]217