İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 548 Hüküm no: 643 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule bahçıvânları ile Kapamacı Loren v. Artin’in anlaştıkları Bahçıvân tekâlifi Ma‘rûz Âsitâne-i aliyye ve tevâbi‘i olan bilâd-ı selâsede vâki‘ Yedikule tâ‘bir olan bahçıvân tâifesinin Kasımpaşa koluna tâbi‘ Ortaköy bahçıvânlarının yiğitbaşısı ashâb-ı arzuhâl Aşikod ustalarından Niko ve Toma ve Nikola ve Dimitri ve Dono vesâir cerîdede mazbûtü’l-esâmî zimmîler meclis-i şer‘-i münîrde bahçıvânlar kethüdâsı İsmail Ağa tarafından mürsel vekîli oğlu Ahmed Haseki hâzır olduğu hâlde derûn-ı arzuhâlde merkūmü’l-ism Kapamacı Loren v. Artin zimmî muvâcehesinde bâ-evâmir-i aliyye Tersâne-i Âmire’de istihdâm için verilen ameleden mâru’z-zikr Ortaköy bahçıvânlarının hisselerine isâbet eden beher yevm yedi nefer amelenin ücretleri vesâir tahsîn-i emlâk için nâzile olan tekâlifi beynimizde bahçelerimizde ve mülklerimiz olan gediklerimize göre ta‘dîl ve tesviye-i şürûtuna ri‘âyet olunarak tevzî‘ ve taksîm olunmak îcâb eder iken mesfûr Loren zimmî mutasarrıf olduğu bir kıt‘a bahçesi için nâzile olan tekâliften beher sene rûz-ı hızırında hissesine elli iki buçuk guruş iktizâ etmişken birkaç seneden beri ancak on beşer guruş verip mâ‘adâsını vermekden ibâ vü imtinâ‘ etmekle beynimizde bahçelerimize göre ta‘dîl ve tesviye-i şürûtuna ri‘âyet olunmak murâdımızdır deyü beynimizde ba‘de’l-münâza‘a beynimiz tevfîk ve ıslâh olunup fîmâ ba‘d mesfûr Loren zimmî hisse-i mezkûresi için beher sene rûz-ı hızırında otuz guruş vermek üzere müte‘ahhid olmağla biz dahi vech-i meşrûh üzere râzılar olup kat‘-ı münâza‘a eyledik dediklerinde ol dahi tasdîk eylediği İstanbul mahkemesinde tescîl ve huzûr-ı âlîlerine i‘lâm olundu. Fî-selh-i Zilka‘de sene [1]217