İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 561 Hüküm no: 653 Orijinal metin no: [Arka kapak] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırancılacı fırınlarınlarında pişirilen has ve beyaz narhının, ekmek fiyatının yarısı olacağı Ma‘rûz Sâdır olan fermân-ı âlîlerine imtisâlen esâr sicillâtı tetebbu‘ olundukda francalacı fırınları bir müddet mesdûd olup bin iki yüz on üç senesi evâilinde bâ-fermân-ı âlî küşâdına izin ve ruhsat verildiği esnâda Sadrâzam-ı sâbık Devletlü İzzet Mehmed Paşa hazretlerinin lisânen sâdır olan emirlerine mebni nân-ı azîzin sülüsânı olarak francala ve has ekmeğin bir paralığı elli üç buçuk dirhem olmak üzere es‘âr siciline kayd ve târih-i merkūmdan beri ol vechile i‘mâl oluna gelmiş olduğu ihbâr olunub mâ‘adâ husûs-ı mezkûrun vech-i meşrûh üzere nizâmına dâir sebd-i kaydına zaferyâb olunmadığı ve kadîmden beri francala ve has ekmek beyninde kat‘an fark olmayıp ikisi bir nev‘den ibâret ve taht-ı nizâma dâhil olup lâkin okka ekmeği tâ‘bir olunur bâ-evâmir-i aliyye birkaç fırına mahsûs ve gāyetü’l-gāye hâssu’l-hâs ve pişkin olarak dolu i‘mâl olunan francala taht-ı nizâma dâhil olmayıp kıyye ile bey‘ olunup mâ‘adâ cümlesi taht-ı nizâma dâhil ve tabh eyledikleri francalanın has ve beyaz tabhı nisâbında olarak vezni vakit ve zamânına göre nân-ı azîz narhı kaç dirhem bir paraya olur ise nân-ı azîzin nısfı olmak nizâm-ı kadîm ve düstûrü’l-amel olduğu Başmuhâsebe’den ihrâc olunan derkenârdan müstebân olup lâkin francalacı fırınlarından bazıları vech-i meşrûh üzere has ve beyâz tabhı nisâbında olarak bir kıyyesi on iki para yâhud dahi ziyâde hesâbı üzere noksan-ı fâhiş ile i‘mâl ve esvâk ve pazarda ibâdullâha bey‘e cesâret etmeleriyle bu vechile esnâf-ı merkūme beynlerinde ta‘dîl ve tesviye husûsu re’y-i rezîn-i isâbet-karînlerine menût mevâddan idüğü İstanbul Mahkemesi’nden huzûr-ı âlîlerine i‘lâm olundu. Fî-17 Receb sene [1]217