İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 559 Hüküm no: 652 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a Kayseri’den deri getirenlerin nizamı Kayseriye sahtiyânlarına dâir i‘lâm Ma‘rûz Sayalmacı tâ‘bir olunur Kayseriye’den sahtiyân iştirâ ve İskilib kazâsına nakl ve mest dikip Âsitâne-i aliyyeye tesyîr ve ibâdullâha bey‘ eden ashâb-ı arzuhâl İskilib ahâlîsinden Zaloğlu Ahmed ve Şabancıoğlu Osman Beşe ve Beşikçioğlu el-Hâc Ali ve Tebelioğlu İbrahim ve Küçük Mehmed oğlu Abdullah vesâir mazbûtü’l-esâmî kimesneler bi’d-defa‘ât Çarşamba günü arz odasında huzûr-ı âsafânelerinde ba‘dehû du‘âhâne-i dâ‘îlerinde ma‘kūd meclis-i şer‘-i münîrde Âsitâne-i aliyyede tâcirler kethüdâsı es-Seyyid Hüseyin Çelebi hâzır olduğu hâlde Kayseriye sahtiyânı tâcirlerinden Bahçecizâde Ahmed Efendi ve el-Hâc Hüseyin ve es-Seyyid Ahmed ve es-Seyyid Mustafa ve es-Seyyid Hasan ve Kara Hasan ve Alemdâr Hüseyin vesâirleriyle terâfu‘larında bizler kadîmden beri Kayseriye’den sahtiyân iştirâ ve İskilib’e nakl ve mest dikip Âsitâneye celb ve tesyîr ve rahîs bahâ ile ibâdullâha bey‘ ve ol vechile ta‘ayyüş edegeldiğimizden mâ‘adâ Âsitâne-i aliyyede haffâfân meta‘ının kesret ve vefretine bâ‘is ve bahâsının rahîs olmasına bâdi olduğuna binâen mukaddemâ vech-i meşrûh üzere izni hâvi yedimize fermân-ı âlîşân dahi i‘tâ buyrulmuşken tüccâr-ı merkūmun bu esnâda bizi kâr u kesbimizden men‘ irâdesiyle nehyi mutazammın Kayseriye’de şerîklerine hufyeten mektûb göndermeleriyle şürekâsı dahi debbâğân tâifesini ıtmâ‘-birle yek-dil ve yek-cihet olup bize sahtiyân vermekten ibâ vü imtinâ‘ etmeleriyle ol vechile bizi kesbimizden dûr ve mağdûriyetimize sebeb-i müstakil olduklarından gayrı dikilmiş mest Âsitâne-i sa‘âdete vürûd etmediğine mebni kıllet ve galâsına bâdi olmalarıyla mezbûrların bu vechile te‘addîleri men‘ ü def‘ olunması matlûbumuzdur deyü işbu iki kıt‘a arzuhâlleriyle iştikâ ettiklerinde onlar dahi cevâblarında müdde‘ûn-ı mezbûrûn Kayseriye’de i‘mâl olunan sahtiyânın alâsını şirâya tâlibler olup evsat ve ednâsından kat‘â iştirâ etmemeleriyle Âsitâne-i sa‘âdete a‘lâ sahtiyânın kıllet üzere vürûduna bâ‘is olduğundan mâ‘adâ mahâll-i mezkûrda dikdikleri mestlerinin ekserîsini âhar mahallere nakil ve gāli bahâ ile füruhta cesaretleri nizâm-ı kadîmimizin ihtilâl ve izmihlâline sebeb olmuşdur deyü beynlerinde ba‘de’l-münâza‘a beynleri tevfîk ve ıslâh olunup mârru’z--zikr Kayseriye’de sahtiyânı üç nev‘ i‘mâl etmeleriyle mukaddemâ nizâm-pezîr olduğu üzere beher turası dörder sahtiyân olarak mahallinde alâsının turası on dört guruşa ve evsatı on üç guruşa ve ednâsı on bir guruşa olmak üzere fîmâ ba‘d İskilib ahâlîsi mezbûrûn üç nevinden mahlût sahtiyân iştirâ edip turasından a‘lâsını tefrîk etmeyip ve diledikleri mestleri peyderpey Âsitâne-i aliyyeye nakl ve tesyîr etmek ve tâcir esnâfı mezbûrûn dahi ber-minvâl-i muharrer debbâğân tâifesini ıtmâ‘ ile bize bey‘ etmekten imtinâ‘ ettirmeyip bizler ve gerek tâcir-i mezbûrlar cümlemiz iştirâ edip ber-vech-i muharrer hareket olunmak üzere tarefeynden her birimiz râzılar olup vech-i meşrûh üzere ittihâd ve ittifâk ve ahd ve mîsâk etmemizle ba‘de’l-yevm tarefeynin her kangısından hilâf-ı ta‘ahhüd bir hareket zuhûr ederse tedîbât-ı lâyıkası icrâsına cümlemiz bi’l-ittifâk râzılarız dediklerini tâcir esnâfı mezbûrûn tasdîk etmeleriyle sâlifü’l-beyân İskilibli Sayalmacılarının vech-i meşrûh üzere sahtiyân iştirâlarına kimesne tarafından bî-vech müdâhale olunmamak bâbında bir kıt‘a tuğralı fermân-ı âlîşân sudûrunu istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-3 min-Zilhicce sene [1]217 Li-külli bed’in hitâmun ve li-külli radî‘in nizâmun ve’l-hamdü lillâhi alâ hüsni’t-tamam ve ene’l-abdü’l-fakīr ileyhi Subhânehu ve te‘âlâ Ömer Efendizâde Süleyman el-Kādî bi-Dârü’s-saltanatü’s-seniyye Gafera lehumâ Süleyman Sezâyi hâtem-i devlet