İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 73 Hüküm no: 9 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berat kandilinin kandiller yakılarak ilan edilmesi Bâ-sah İstanbul Kādısı fazîletlü efendi İşbu i‘lâmınız mübârek rikâb-ı kamer-tâb-ı hazret-i cihandârîye arz ve takdîm olundukda ma‘lûm-ı hümâyûnum oldu. Hak te‘âlâ nice emsâliyle müşerref eyleye deyü ma‘an takdîm kılınan takrîrimiz bâlâsına mübârek ve mes’ûd hatt-ı şerîf-i zıllullâhî şeref-efzâ-yı sudûr olmağla i‘lâmınız mûcebince leyle-i mezkûre îkād-ı kanâdîl eylemeleri için cevâmi‘-i mezkûre kayyumbaşılarına tenbîh ve tekîde himmet eyleyesiz deyü buyuruldu. Fî 11 Ş sene 1222. Berât-ı şerîf kandil i‘lâmı Dergâh-ı felek-medâr ve bârgâh-ı sipihr iktidâra ma‘rûz-ı dâ‘î-i adîmü’l-istitâ‘a ve şâkirü’l-ihsânlarıdır ki İşbu sâl-i meymenet iştimâlin Cemâziyelâhire ve Recebi’l-ferd gurreleri hâlâ bi’r-rü’ye sâbit olmayıp her biri tekmîl-i selâsîn ile itmâm ve mâh-ı Şa‘bâni’l-mu‘azzam yevm-i ahaddan i‘tibâr olunduğuna binâen leyle-i mübâreke-i Berât-ı şerîf mâh-ı mu‘azzamın on beşinci işbu Pazar gecesine tesâdüf etmekle de’b-i dîrîn-i Devlet-i aliyye-i ebedi’l-karâr ve resm-i kavânîn-i mer‘iye-i kadîmetü’l-istimrâr üzere tefrîc kılıp müminîn ve müminât için minârât-ı cevâmi‘-i şerîfe ve mesâcid-i latîfe îkād-ı kanâdîl-i nûr-efşân ile tezyîn olunmak bâbında cevâmi‘-i selâtîn-i i‘zâm — subbet aleyhim sicâlü’r-rahmeti ve’l-gufrân— hazerâtı kayyumlarına tenbîhi hâvî fermân-ı âlîleri sudûru iktizâ eylediği İstanbul Mahkemesi’nden dergâh-ı felek-medâr ve bârgâh-ı gerdûn-i‘tibârları turâbına i‘lâm olundu. Bâkī emr ü fermân hazret-i veliyyü’n-ni‘meti ve’l-ihsân. Fi’l-yevmi’t-tâsi‘ min-Şa‘bâni’l-mu‘azzam li-sene isneyn ve ışrîn ve mi’eteyn ve elf.