İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 73 Hüküm no: 10 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mazlum Kirkor’un Samatya Abdi Çelebi mahallesindeki tütüncü dükkânı âletlerini satması Tütüncü gediği, Ma‘rûz İstanbul’da Samatya’da Abdi Çelebi mahallesinde Şerbethâne karşısında manav dükkânı ittisâlinde kâin bir bâb tütüncü dükkânı derûnunda mevcûde tütüncü gediği âlât-ı lâzımesine altmış seneden mütecâviz mu‘teber gedik olmak üzere mâliki tütüncü Mazlum Kirkor v. Agob zimmî meclis-i şer‘-i enverde tütüncüler kethudâsı İbrahim Ağa ve yiğitbaşı es-Seyyid Abdullah ve Şehremîni Mustafa Efendi ile Aci Vasil ve Françesko zimmîler hâzır oldukları hâlde bâ‘isü’l-i‘lâm Aci Kerupa [Kirkor] v. Karabet ve şahsı mu‘arrefe Aleknazar bt. Yuvan Nasrâniye muvâcehelerinde ben bâlâda mezkûr mâlik olduğum tütüncü dükkânı gedik âlâtımı tarafeynden bi’l-îcâb ve’l-kabûl bâtten ve sahîhan üç yüz guruş semen-i makbûza mersûmâna münâsafeten bey‘ ve teslîm, onlar dahi ber-vech-i muharrer iştirâ ve kabûl edip mebî‘-i mezkûrun tağrîr ve gabnine müte‘allika da‘vâdan dahi her birimiz âharın zimmetini ba‘de’l-ibrâ ve’l-kabûl benim gedik-i mezkûrda aslâ ve kat‘a alâka ve medhalim kalmayıp mersûmânın münâsafeten mülk-i müşterâları olmuşdur dedikde ol dahi ba‘de’t-tasdîk bundan akdem Âsitâne-i aliyye ve tevâbi‘i olan Bilâd-ı selâse’de vâki‘ tütüncü dükkânları tahrîr ve gedikleri mu‘teber olmak üzere Ma‘den Kalemi’ne sebt ve kayd olundukda mahâll-i mezkûrda kâin dükkân-ı mezkûrun gediği sehven kayd olunmayıp tedâvül-i eyâdî ile müddet-i merkūmeden berü tütüncü gediği olmak üzere ben mâlik ve mutasarrıf olup dekâkin-i sâire gedikleri misillü dükkân-ı mezkûr gediği dahi kalem-i mezbûra sebt ve kayd olunmak iktizâ etmekle vukūf-ı tammı olanlardan suâl ve tefahhus olunup gedik-i mezkûru müşteriyân-ı mersûmân ismi tasrîhiyle kalem-i mezbûra kayd olunmak murâdımdır dedikde husûs-ı mezkûr hâzırûn-ı merkūmûndan suâl olundukda zikr olunan dükkân gediği kadîmî tütüncü dükkânı olup ve gediğinin mutasarrıfı Mazlum Kirkor zimmî olduğunu her biri meclis-i şer‘de alâ-tarîki’ş-şehâde haber vermeleriyle dükkân-ı mezkûr gediği mersûm Kirkor zimmî bey‘inden müşteriyân-ı mersûmân Kirkor ve Aleknazar uhdelerine Ma‘den Kalemi’nde kayd ve yedlerine sûret i‘tâ olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 5 Şa‘bân sene 1222.