İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 104 Hüküm no: 45 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife bt. Mustafa’nın izinsiz bağırsak alıp kiriş imal etmemek üzere taahhütte bulunması Kirişçi esnâfına dâir Ma‘rûz Mahrûse-i Galata’da Mumhâne İskelesi’nde kâin Kirişhâne’de sâkinler kirişçi esnâfının yiğitbaşıları es-Seyyid el-Hâc Ahmed ve ustalarından el-Hâc Mustafa ve Küçük Mehmed ve Eyüb Çelebi ve Derviş Süleyman ve Hasan Beşe ve Hüseyin Beşe ve Hafız Ebûbekir ve Abdi Çelebi ve Abdullah ve sâirleri meclis-i şer‘-i enverde mahrûse-i mezbûreye muzâfe kasaba-i Kasımpaşa’da sâkine zâtı mu‘arrefe Hanife bt. Mustafa nâm hatun muvâcehesinde bizler Galata’ya mahsûs kirişci esnâfı olup yedimizde olan bâlâsı mübârek hatt-ı hümâyûn ile müveşşah işbu bir kıt‘a fermân-ı âlî-şân nâtık olduğu üzere Galata’nın derûn ve bîrûnunda ve havâlîsinde ve Kasaba-i Kasımpaşa’da ve Pîrîpaşa ve Hasköy ve Karaağaç ve Saidabâd karyelerinde ve Galata’ya tâbi‘ Tophâne ve Beşiktaş ve Ortaköy ve Kuruçeşme ve Rumeli Hisârı ve İstinye ve Yeniköy’den Kavak Hisârı’na varınca vâki‘ kasabât ve havâlîsinde zebh olunan bi’l-cümle hayvanâtın bağırsaklarını bizler alıp ecânibden kimesnenin hufyeten bağırsak alıp kiriş i‘mâl ve âhara bey‘i iktizâ etmez iken işbu mezbûre Hanife Kadın hudûdumuz olan Kasımpaşa’da hufyeten bağırsak iştirâ ve i‘mâl edip ve hattâ işbu mu‘âyene olunan kirişleri i‘mâl ve âhara bey‘ eder iken ahz olunmağla suâl olunup fîmâ-ba‘d bağırsak almayıp ve kiriş i‘mâl etmemesi iktizâ eylediği mezbûreye tefhîm olunmak murâdımızdır deyü mazmûnu takrîr-i meşrûhlarına mutâbık bâlâsı mübârek hatt-ı hümâyûn ile müveşşah bir kıt‘a fermân-ı âlî ibrâzıyla istirhâm eylediklerinde mezbûre Hanife Hatun cevâbında mazmûn-ı fermân-ı âlî-şânı bi-tamamihi ikrâr ü i‘tirâf ve ber-mûceb-i emr-i âlî fîmâ-ba‘d bağırsak almayıp ve kiriş i‘mâl etmemek üzere bi’r-rızâ ta‘ahhüd edip bu vechile külliyen kat‘-ı münâza‘a eyledikleri İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 29 Ş sene 1222