İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 104 Hüküm no: 44 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avrupa tüccarından Kostantin v. Yorgi’ye olan borcunu ödemesi hususunda Yako v. David’e tenbihte bulunulması 3113 guruş hüküm Ma‘rûz Arzuhâl eden Avrupa Tüccârı’ndan Kostantin v. Yorgi zimmî meclis-i şer‘-i enverde derûn-ı arzuhâlde mastûrü’l-ism Kalpakçı Yako [v.] David Yahûdî muvâcehesinde mersûm Yako Yahûdî zimmetinde ma‘lûmü’l-mikdâr deri semeninden bâ-temessük-i mütevellî üç bin yüz on üç guruş alacak hakkım olmağla meblağ-ı mezkûru mersûm Yako Yahûdîden hâlâ taleb ederim deyü ba‘de’d-da‘vâ ve’s-suâl mersûm Yako Yahûdî cevâbında temessük-i mezkûru ve meblağ-ı merkūm cihet-i merkūmeden zimmetinde sahîhan deyni olduğunu ikrâr ü i‘tirâf, lâkin benim müdde‘î-i mersûmdan mâ‘adâ on beş nefer kimesnelere dahi külliyetli deynim olup hâlâ edâya iktidârım olmamağla her biri rızâlarıyla beni tecîl etmişler idi. Mersûm Kostantin dahi sâir dâyinlerim misillü beni tecîl eylesin deyü takrîr-i meşrûhu üzere tasaddî eylediği da‘vâsı mûvecceh olmamağla mersûm Yako Yahûdînin ikrâr ü i‘tirâfıyla lâzım gelen meblağ-ı mezkûr üç bin yüz on üç guruşu müdde‘î-i mersûm Kostantin zimmîye hâlâ edâ ve teslîme mersûm Yako Yahûdîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 23 Ş sene 1222