İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 105 Hüküm no: 47 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefeli Camii İmamı Hafız Mehmed Efendi’nin mahalleden ihraç edilmesi Mahalleden ihrâc Ma‘rûz İstanbul’da Salmatomruk nâm mahâlde Ka‘riye Atik Alipaşa mahallesi imâmı es-Seyyid Hafız İbrahim Efendi ve es-Seyyid Osman Ağa ve Ahmed Ağa ve Pazarbaşı Ömer Ağa ve es-Seyyid Ebûbekir Ağa ve Ahmed Ağa ve es-Seyyid Hasan Ağa ve Mehmed Nuri Efendi ve es-Seyyid Mustafa ve es-Seyyid Mehmed Ârif Efendi ve Ali Efendi ve es-Seyyid Ahmed Efendi ve el-Hâc Osman ve es-Seyyid Ali ve Mehmed Çelebi Efendi ve Terâzici Mehmed Emin Ağa ve Haseki Osman Ağa ve Lütfullah Ağa ve Sarrâc Süleyman Ağa ve Molla Ali ve sâirleri meclis-i şer‘-i münîrde mahalle-i mezbûrede vâki‘ Ebâ Said el-Hudrî hazretlerinin türbedârı ve mahalle-i mezbûre câmi‘-i şerîfi kayyumu olan Kefeli Câmi‘i imâmı Hafız Mehmed Râşid Efendi b. Süleyman muvâcehesinde mezbûr Hafız Mehmed Râşid Efendi mahallemizde sâkin olup lâkin kendi hâlinde ırzıyla mukayyed ve hizmetiyle meşgūl olmayıp bed-zebân ve hadîdü’l-lisân ve her birimize gûnâ-gûn ta‘zîri mûcib elfâz ile itâle-i lisân ve menhiyâtı mürtekib olup bi’l-külliye kendüden emn ü rahatımız meslûb olmağla defa‘âtle nush u pend eylediğimizde kat‘a ısgā etmeyip bu misillü hilâf-ı şer‘-i mutahhar evzâ‘ u etvârdan bir dürlü hoşnûd ve râzı değilleriz deyü muvâcehesinde sû-i hâlini ihbâr birle herbiri iştikâ ve mahalle-i mezbûreden ihrâc birle türbedâr ve kayyumluk hizmetine tarafından bir mütedeyyin ve mu‘temed kimesneyi tevkîl etmeğe ta‘ahhüd eylemesi matlûbumuzdur deyü istid‘â eylediklerinde fîmâ-ba‘d türbe-i şerîfe ve kayyumluk hizmetlerine ber-vech-i muharrer birer kimesneyi tevkîl ile mahalle-i merkūmeden birkaç gün mürûrunda hurûc etmek üzere ta‘ahhüd eylediği İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 28 Ş sene 1222.