İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 106 Hüküm no: 48 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enfiyeci ustabaşılığından azledilen Yani ve Apostol’un yerine Yorgaki ve Hıristaki’nin ustabaşı tayin edilmesi Enfiyeci dükkânlarına dâir Ma‘rûz Sâdır olan fermân-ı âlîlerine imtisâlen işbu takrîr ve derkenâra nazar olundukda Âsitâne-i aliyye ve tevâbi‘inde mevcûd kırk aded enfiyeci dekâkini gedikleri mutasarrıfları içlerinden dört neferini intihâb ve ihtiyâr ve üzerlerine ustabaşı nasb olunup dâimâ umûr-ı esnâfı şurût-ı nizâmlarına tatbîkan lâyıkıyla rü’yet ve idâre eylemeleri Haremeyn Mukāta‘ası’nda kayd ve sûretleri ve Başmuhâsebe’den ilmühaberi i‘tâ olunmuş olduğu müstebân olup ber-minvâl-i meşrûh içlerinden bi’l-intihâb mukaddemâ ustabaşı nasb olunmuş olan Apostol ve Yani ve Barnabas zimmîler ile İsak nâm Yahûdîden mersûmân Apostol ve Yani zimmîler sû-i hareketlerine binâen tard ve ihrâc ve yerleri hâlî ve mu‘attal kalmağla bâlâda mezkûr kırk aded gedik mutasarrıfı mazbûtü’l-esâmî enfiyeci esnâfı meclis-i şer‘-i münîrde içlerinden Yorgaki v. Manol ve Hıristaki v. Yasefaki zimmîler muvâcehelerinde mersûmân Barnabas ve İsak Yahûdî hâzır oldukları hâlde mukaddemâ içimizden muhtârımız olup üzerimize ustabaşı nasb olunan dört neferden Yani ve Apostol zimmîler cünhaları takrîbiyle tard ve ihrâç olunmağla yerlerine işbu mersûmân Hıristaki ve Yorgaki zimmîler cümlemizin müntahab ve muhtârı ve kâr-güzâr ve müstakīm ve perhiz-kâr olmağla üzerimize ustabaşı nasb olunması ve hâzırân-ı mersûmânın ibkāsı murâdımızdır deyü ihbâr ve iltimâs eylediklerinde mersûmân Yorgaki ve Hıristaki zimmîler dahi esnâf-ı mersûmeye ustabaşı nasb ü ta‘yîn olunduklarında onlar dahi kabûl ve hizmet-i lâzımesi olan umûr-ı esnâfı şurût-ı nizâmlarına tatbîkan lâyıkıyla rü’yet ve idâreye hâzırân-ı mersûmân ile ma‘an ta‘ahhüd etmeleriyle mersûmûn Hıristaki ve Yorgaki ve Barnabas ve İsak Yahûdîden her birinin ustabaşılıkları Haremeyn Mukāta‘ası Kalemi’ne kayd ve yedlerine müceddeden başka başka sûret ve Başmuhâsebe’ye ilmühaberleri i‘tâ olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 3 N sene 1222.