İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 108 Hüküm no: 51 Orijinal metin no: [6b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Nazif’in, Süleyman b. Mehmed aleyhindeki vakıf menzil tasarruf hakkı satışının iptaline dair davasının meşru olmadığı Astoros’da menzil mâddesi Ma‘rûz Sâhib-i arzuhâl es-Seyyid Mehmed Nazif b. Yakub meclis-i şer‘-i münîrde zikri âtî vakıf menzile bâ-temessük vaz‘-ı yedi mütehakkık olan Süleyman b. Mehmed mahzarında İstanbul kādıları efendiler hazerâtı nezâretlerinde âsûde Dâyezâde Vakfı musakkafâtından medîne-i Üsküdar’a tâbi‘ İstavros karyesinde kâin mezbûr Süleyman’ın mutasarrıf olduğu ma‘lûmü’l-hudûd bir bâb vakıf menzilin mukaddemâ rub‘u benim ve rub‘-ı âharı zevcem gāibetü ani’l-meclis Zehra Hatun’un tasarruflarında iken işbu târihden sekiz ay mukaddem ben asâleten ve zevcem tarafından vekâleten mutasarrıf olduklarımız nısf menzil-i mezkûru dört yüz yetmiş guruş bedel-i makbûz mukābelesinde mezbûr Süleyman’a bâ-re’y-i mütevellî rızâmla kat‘a ferâğ ve tefvîz ol dahi tefevvüz ve kabûl ve mütevellî-i vakf ferâğımdan üzerine tahrîr ve temhîr ve tasarrufuna izin vermiş idi. Lâkin ben ol târihde mağdûrü’l-hâl olmamla def‘-i zarûret için ol-mikdâr bedel-i makbûz mukābelesinde ferâğ etmiş idim. Hâlâ nısf menzilin ziyâde bedele tahammülü olmağla ferâğıma nâdim ve pişman olup ya tahammülü mertebe bedel versin, yâhûd nısf menzili bana [7a] geri ferâğ eylesin deyü mütevellî vekîli hâzır olduğu hâlde eylediği da‘vâsında nısf menzili asâleten ve vekâleten bâ-re’y-i mütevellî rızâsıyla kat‘a ferâğ ve kabz-ı bedel edip mütevellî-i vakf tasarrufuna izin ve temessük verdiğini mukırr u mu‘terif iken takrîr-i meşrûhu üzere tasaddî eylediği da‘vâsı meşrû‘a ve mu‘tebere olmamağla mezbûr Süleyman’a suâl dahi teveccüh etmeyip müdde‘î-i mezbûr da‘vâ-yı mezkûresiyle mezbûr Süleyman’a bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 21 Ş sene 1222.