İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 108 Hüküm no: 50 Orijinal metin no: [6b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından İstefan v. Avadik’in küreğe konulması Vaz‘-ı Kürek Ma‘rûz Âsitâne-i aliyye’de vâki‘ sandalcı esnâfının kethudâsı es-Seyyid Mehmed Emin Ağa ve kethudâ vekîli es-Seyyid Mehmed Salih Ağa ve yiğitbaşı es-Seyyid el-Hâc Halil ve es-Seyyid Ademzâde es-Seyyid Mehmed Said Efendi ve Hafız Hasan Efendi ve es-Seyyid İsmail Ağa ve Ali Ağa ile re‘âyâ ustalarından Aşçıbaşı Agob ve Arab Anton ve İstefan ve Dimitri ve Nikola ve Vasil ve Kiryako ve sâir Müslim ve zimmîler meclis-i şer‘-i münîrde esnâf-ı merkūmeden İstefan v. Avadik zimmî muvâcehesinde mersûm İstefan zimmî esnâfımızdan olup lâkin cümle ustalarımıza itâ‘at etmediğinden mâ‘ada esnâfımız beyninde dürlü dürlü fesâdı mûcib hâlât-ı reddiyeye ibtidâr ve şirâze-i nizâmımızın mugāyiri nâ-hemvâre harekete ictisâr birle cümlemiz kendiden hoşnûd ve râzılar değilleriz deyü sû-i hâlinden bahisle iştikâ ve vaz‘-ı kürek ile tedîb olunmasını cümlesi istid‘â etmeleriyle mersûm İstefan zimmî ıslâh-ı nefsi zâhir oluncaya değin vaz‘-ı kürek ile tedîb olunması iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 9 Ramazan sene 1222.