İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 114 Hüküm no: 60 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merdane Terlikçileri Esnafı Kethudası Hacı Ömer ve sairlerinin Derviş Mehmed Ağa aleyhindeki dükkân davasının meşru olmadığı Derzi gediği mâddesi Ma‘rûz İstanbul’da Merdane Derlikçiler Kethudâsı el-Hâc Ömer b. el-Hâc Ahmed ve esnâfından Hacı Ahmed ve Mustafa ve Molla Ahmed ve Hasan ve Mustafa hâzır oldukları hâlde meclis-i şer‘-i enverde zikri âtî gedik âlâtına vaz‘-ı yedi mütehakkık olan Dülbendçi ve Bezzâzlar Kethudâsı Derviş Mehmed Ağa b. İbrahim mahzarında derzi esnâfından Ariton v. Manil zimmî kezâlik hâzır olduğu hâlde İstanbul’da Mercan Çarşısı kurbünde kolluk karşısında kâin hâzır-ı mersûm Derzi Ariton zimmînin bâ-temessük-i mütevellî bi’l-icâreteyn taht-ı tasarrufunda olan bir bâb derzi dükkânı gedik âlât-ı lâzıme-i ma‘lûmesi dahi hâzır-ı mersûm Ariton zimmînin mülkü olmağla işbu sene-i mübâreke Rebî‘ülâhiri’nin on beşinci günü âlât-ı mezkûreyi iki bin guruş semen-i makbûza işbu mezbûr Derviş Mehmed Ağa’ya bâ-hüccet bey‘ ve teslîm, ol dahi iştirâ ve tesellüm edip ol-vechile âlât-ı mezkûreye mülk-i müşterâsı olmak üzere mezbûr Derviş Mehmed Ağa vaz‘-ı yed etmekle dükkân-ı mezkûr mukaddemâ derlikçi dükkânı olup havâyî derlikçi gediğine ve âlâtına esnâfımızdan mâlik olan bundan akdem vefât etdikde derûnunda olan âlât-ı lâzımesi dahi veresesi semen-i ma‘lûm ve makbûza işbu hâzır-ı mersûm Ariton zimmîye bey‘ ve teslîm edip havâyî gediğine dahi esnâfımızdan ol târihde müstahak kimesne bulunmamağla mersûm Ariton zimmî uhdesinde esnâfcak terk etmiş idik, mersûm Ariton zimmî şirâen mâlik olduğu derlikçi âlâtını ref‘ edip malından vaz‘ eylediği [8a] derzi âlâtını işbu mezbûr Derviş Mehmed Ağa’ya bey‘ etmiş idi. Lâkin dükkân-ı mezkûr mücerred mukaddemâ derlikçi dükkânı olmağla el-yevm esnâfımızdan havâyî gediğine müstahak kimesne mevcûd olduğuna binâen mezbûr Derviş Mehmed Ağa iştirâ eylediği derzi âlâtını ref‘ edip dükkân-ı mezkûr mutasarrıfı hâzır-ı mersûm dahi dükkân-ı mezkûru esnâfımızdan gediğine müstahak kimesneye îcâr ve teslîm eylemesi için mezbûrân Derviş ve Mehmed Ağa ve Ariton zimmîden her birine cebr olunsun deyü mezbûr el-Hâc Ömer’in takrîr-i meşrûhu üzere tasaddî eylediği da‘vâsı hilâf-ı şer‘-i şerîf olmağla kelâmına iltifât olunmayıp mezbûr derviş Mehmed Ağa’ya şer‘an suâl dahi teveccüh etmemekle müdde‘î-i mezbûr ve esnâfı hâzırûn-ı mezbûrûndan her biri da‘vâ-yı mezkûreleriyle mezbûrân Derviş Mehmed Ağa ve Ariton zimmîden her birine bi-gayrı vech-i şer‘î mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu]. Fî 17 N sene 1222.