İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 113 Hüküm no: 59 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı esnafından Hürmüz ve ortağı Avanes’in bazı şahıslara olan borçlarını taksit halinde ödemesi 15060 guruş taksîten edâ için fermân istid‘âsı Ma‘rûz Sâdır olan fermân-ı âlî-şâna imtisâlen sâhib-i arzuhâl Alacacı Hürmüz ve şerîki Avanes zimmîlerin gāibûn ani’l-meclis Halebli el-Hâc Mehmed ve Şamlı Şeyh Emin ve es-Seyyid Mustafa ve Halebli Bogos ve Sandalcı Kirkor ve Sandalcı Kiryako ve Sandalcı Eci Yani ve Sandalcı Yorgi ve Sandalcı diğer Yani ve Üsküdarî Dimitri ve Sandalcı Corci ve Alacacı Nikfor ve Kokas ve Kîseci zimmî ve Gülmezoğlu Alacacı Dimitri ve Kriç ve karındaşı Serkiz ve Ankaralı Agob ve şerîki Nasib zimmîlere cihât-ı müte‘addideden zimmetlerinde on beş bin altmış guruş zimmetleri olup düyûn-ı mezkûreyi hâlen ve def‘aten edâya bir vechile kudretleri olmadığı zâhir iken dâyinlerinin ba‘zıları imhâl ve tehîr edip lâkin içlerinden ba‘zıları mehle râzı olmayıp alacaklarını hâlen mütâlebe birle mersûmân Hürmüz ve Avanes zimmîleri ta‘cîz ve tazyîkden hâlî olmamalarıyla mersûmân Hürmüz ve Avanes deynleri olan meblağ-ı mezkûr on beş bin altmış guruşu dâyinleri mezbûrûna işbu târih-i i‘lâmdan i‘tibâr ile beher sene hitâmında beher bir dâyine alacağının sülüsünü edâ ile üç seneye değin üç taksît ile emsâline kıyâsen ber-vech-i taksît edâsına ruhsat husûsunda istirhâmları işbu arzuhâlden müstebân olduğundan başka hâzırûn bi’l-meclis Bezzâzlar Kethudâsı Derviş Mehmed Ağa b. el-Hâc İbrahim ile ve Markar ve Avanes ve Sahak ve Ohan ve Hayrabet ve Peştemalcioğlu Sahak ve Merker Mosi ve Bedros ve Mıgırdıç dahi meclis-i şer‘de mersûmânın hâlen edâ-i deyne adem-i iktidârını ihbâr ve mersûmânın ber-vech-i taksît edâ-i deyn ile dâyinlerinin hâlen mütâlebelerinden tahlîsleri için bâlâsı tuğrâ-yı hazret-i cihân-dârî ile müveşşah yedlerine bir kıt‘a fermân-ı âlî inâyet ve ihsân buyurulmak iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 13 N sene 1222.