İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 116 Hüküm no: 62 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın Bakkal Koneboğlu Dimitri aleyhindeki alacak davasının reddedilmesi 600 guruş men‘ Ma‘rûz Sâhib-i arzuhâl Mustafa Ağa b. Mehmed meclis-i şer‘-i enverde Bakkāl Koneboğlu Dimitri v. Zahari zimmî muvâcehesinde işbu târihden altı sene mukaddem Yenişehir-i fener kazâsında mütemekkinler gāibûn ani’l-beled Dimitraki ve İsteryo ve Yorgaki zimmîlere malımdan bâ-temessük bin guruş ikrâz ve teslîm edip ba‘dehû meblağ-ı mezbûrun dört yüz guruşunu gāibûn-ı mersûmûn bana edâ, ben dahi ahz ü kabz etmiş idim. Bâkīsi olan altı yüz guruşu dahi mutâlebe eylediğimde gāibûn-ı mersûmûn meblağ-ı mezkûr Koneboğlu Dimitri’nin zimmetine geçdi, var ondan mütâlebe ve ahz eyle demeleriyle ben dahi i‘timad etmemle meblağ-ı bâkī-i mezkûr altı yüz guruşu işbu mersûm Dimitri zimmîden hâlen taleb ederim deyü takrîr-i meşrûhu üzere tasaddî eylediği da‘vâsı iltifâta şâyân olmamağla mersûm Dimitri’ye suâl dahi teveccüh etmeyip mûcebiyle müdde‘î-i mezbûr da‘vâ-yı mezkûresiyle mersûm Dimitri zimmîye bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 29 Ş sene 1222.