İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 116 Hüküm no: 63 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Yanako’nun, Aşçı Nikola aleyhindeki elmas davasından men olunması Elmas çiçek men‘i Ma‘rûz Derûn-ı arzuhâlde mastûr Çukacı Yanako v. Dimitri zimmî meclis-i şer‘-i enverde arzuhâl eden Aşçı Nikola v. Boko zimmî muvâcehesinde Kostandi zimmî ve babası Poşko zimmî ve Kürkçü Todori zimmî hâzır oldukları hâlde işbu târihden bir buçuk sene mukaddem şâkirdim olan sagīr Yorgi zimmî malımdan beş yüz elli guruş kıymetli iki aded elmas çiçeğimi menzilimden hufyeten ahz edip hâzır-ı mersûm Kostandi zimmîye teslîm, ol dahi babası mersûm Poşko zimmîye teslîm, ol dahi işbu mersûm Nikola zimmîye teslîm etmekle mevcûd ise aynlarını müstehleke ise kıymetlerini tazmîn taleb ederim deyü ba‘de’d-da‘vâ ve’s-suâl mersûm Nikola zimmî cevâbında ancak bir aded elmaslıca çiçek âhara bey‘ için hâzır-ı mersûm Poşko zimmîden malı olmak üzere ahz ve hâzır-ı mersûm Todori zimmî yediyle yirmi beş guruşa âhara bey‘ ve semenini mersûm Poşko zimmîye teslîm etmiş idim deyü mersûm Poşko zimmî tasdîkiyle ancak bir aded çiçek ahzını ikrâr, lâkin âhar bir aded çiçek ahzını ve kasr-ı yed olduğu çiçeğin dahi müdde‘î-i mersûmun malı olduğunu ve ziyâde kıymetini inkâr etmekle müdde‘î-i mersûm ber-vech-i muharrer müdde‘âsını beyâna havâle olundukda isbâtdan izhâr-ı acz edip tâlib-i tahlîf dahi olmamağla mûcebiyle müdde‘î-i mersûm da‘vâ-yı mezkûresiyle mersûm Nikola zimmîye mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 17 N sene 1222.