İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 121 Hüküm no: 69 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahtiyancı Selvili Mustafa’ya olan borcunu ödemesi hususunda Uşaklı Tombay Mehmed’e tenbihte bulunulması 648 guruş hüküm İstanbul’da Çukur Han’da sâkin sâhib-i arzuhâl Sahtiyâncı Selvili Mustafa b. Murad meclis-i şer‘-i enverde Uşaklı Tombay Mehmed b. el-Hâc Osman mahzarında mezbûr Tombay Mehmed bin iki yüz on dokuz senesi Recebi’l-ferd’inin yirmi yedinci günü gāib ani’l-meclis el-Hâc Hüseyin Efendi’den iki bin iki yüz on altı guruş iktirâz ve kabz ve istihlâk edip meblağ-ı mezkûr zimmetinde deyn-i sahîhi olduğunu nâtık târih-i mezkûr ile müverrah verilen işbu bir kıt‘a temessük mantûkunca meblağ-ı mezkûra ben dahi bi’l-emr ve’l-kabûl kefîl ve zâmin olduğumdan sonra deyn-i mezkûrun bin beş yüz altmış yedi buçuk guruşunu mezbûr Tombay Mehmed edâ ve teslîm edip bâkīsi olan altı yüz kırk sekiz guruşu gāib-i mezbûr benden kefâletime binâen ahz etmekle ben dahi bi’l-mürâca‘a mezbûr Tombay Mehmed’den taleb ederim deyü ba‘de’d-da‘vâ ve’s-suâl mezbûr Tombay Mehmed cevâbında müdde‘î-i mezbûrun ber-vech-i muharrer kefâletini ikrâr lâkin müdde‘î-i mezbûr meblağ-ı bâkī-i mezkûru edâ eylediğini inkâr etmekle müdde‘î-i mezbûr ber-vech-i muharrer edâ müdde‘âsını kuzâtdan Ahmed Efendi b. Mehmed ve Uşaklı Ahmed b. İbrahim şehâdetleriyle bi’l-muvâcehe ba‘de’l-isbât merkūm Tombay Mehmed müdde‘î-i mezbûrun edâsını dahi ikrâr etmeğin mûcebiyle meblağ-ı bâkī-i mezkûru müdde‘î-i mezbûra edâ ve teslîme mezbûr Tombay Mehmed’e tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 19 N sene 1222.