İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 121 Hüküm no: 68 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çömlekçi esnafından Mahmud, Ekşi Ahmed ve sairlerinin, esnaf kethudası Seyyid Mustafa ve sairleri aleyhindeki davalarında anlaşma sağlanması Çömlekçi esnâfının ibrâsı Ma‘ruz, Medîne-i Hazret-i Ebâ Eyyûbe’l-ensârî -radiye anhu Rabbihi’l-bârîde- Çömlekçi esnâfından olup derûn-ı arzuhâlde mezkûrü’l-ism Mahmud ve Ekşi Ahmed ile Papasoğlu Avanes ve Çakır ve Fincancı Agob ve Hazaros ve Kirkor taraflarından husûs-ı âtîde vekâleti Mehmed Emin Ağa ve es-Seyyid Ahmed Ağa şehâdetleriyle sâbit ve mütehakkık olan es-Seyyid Ahmed b. Abdurrahman meclis-i şer‘-i enverde Çömlekçi Esnâfının Kethudâsı Mustafa ve Yiğitbaşı Numan ve ustalarından Ahmed Ağa ve Ömer Beşe ve es-Seyyid Ahmed Ağa ile re‘âyâ ustalarından Hazaros ve Artin ve Manuk ve diğer Artin ve Maruka ve Kirkor ve âhar Artin ve Agob ve Kamayel ve Avanes ve İstefan mahzarlarında Sultan Bâyezid’de çömlekçi haffâf tâifesinden el-Hâc Veliyüddin ve Hafız Hayrullah ve Derviş Yakub ve Halil ve Mehmed Sadık hâzır oldukları hâlde takrîr-i kelâm edip çömlekçi esnâfı öteden beri i‘mâl eyledikleri bi’l-cümle çömlekçi haffâf ta‘bîr olunur dükkânı esnâfı hâzırûn-ı mezbûrûna bey‘ ile tarafeyn ta‘ayyüş üzereler iken işbu târihden dört mâh mukaddem müvekkillerimiz mezbûrûn çömlekçi esnâfını i‘fâl ve ifsâd, i‘mâl eylediğiniz emti‘anızı haffâf esnâfına bey‘den men‘ edip eğer yedinizde kalır ise bizler alırız deyüp haffâf ile münâza‘aya mübâderet ve metâ‘ları vâfir müddet dükkânlarında kalmış iken müvekkillerim mezbûrûn bizler ol esnâda sizin maslahatınız temşiyyeti için Eyüb Mahkemesi’nden i‘lâm ahzı ve emr-i âlî ısdârı misillü ba‘zı husûsunuza ve sâir umûr-ı ma‘lûmelerinize emirleriniz ile bir mikdâr mebâliğ sarf etmemizle bi’l-mürâca‘a taleb ederiz deyü esnâf-ı mezbûreden iddi‘â sadedinde olmuşlar idi. El-hâletü hâzihî beynleri ıslâh ve tevfîk olunmağla zikr olunan husûslara ve işbu târihe gelince sâir cemî‘ hukūk-ı şer‘iyeye müte‘allika âmme-i da‘vâdan hâzırûn-ı mezbûrûn ile tarafeynden her birleri âharın zimmetlerini kabûlü hâvî ibrâ ve iskāt edip külliyen kat‘-ı münâza‘a eylediler deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 23 Ş sene 1222.