İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 122 Hüküm no: 71 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Bakkal Andon’un kızı Zoye’nin Bakkal Zahari aleyhindeki bakkal gediği talebinden menedilmesi Bakkāl gediği mâddesi Ma‘rûz İşbu târihden on dört sene mukaddem verâseti zevcesi Salti Nasrâniye ile sulbiye kızı Zoyi Nasrâniyeye münhasıra olduğu hâlde hâlik olan Bakkāl Andon v. Teyohar zimmînin kızı arzuhâl eden mu‘arrefetü’ş-şahs mersûme Zoyi Nasrâniye meclis-i şer‘-i enverde zikri âtî bakkāl dükkânı gedik âlâtının otuz sehm-i şâyi‘ini bu esnâda iştirâ etmekle vaz‘-ı yedi mütehakkık olan Bakkāl Zahari v. Yorgaki zimmî muvâcehesinde İstanbul’da Kocamustafapaşa’da kâin el-Hâc Ali dükkânı demekle ma‘rûf dükkân gediğinden yüz yirmi sehm i‘tibârıyla otuz sehm-i şâyi‘i babam hâlik-i mersûmun sağlığında mülkü olup ba‘de helâkihî benimle anam mersûmeye mevrûs olmuş iken ol târihden beri tedâvül-i eyâdî ile bu esnâda işbu mersûm Zahari zimmî şirâen mâlik olup vaz‘-ı yed eylediğine ben ve anam mersûme vâkıfe olduğumuzda bundan akdem mersûm Zahari zimmîden da‘vâ ve hakk-ı irsiyemiz olduğunu muvâcehesinde vech-i şer‘î üzere isbât edip otuz sehm-i mezkûru bâ-i‘lâm-ı şer‘î yedinden nez‘ ve biz mülk-i mevrûsumuz olmak üzere zabt etmiş idik. Lâkin otuz sehm-i mezkûrun senede yüzer guruşdan peştemâllik ta‘bîr olunur gediği kirâsı olan dört senede bin dört yüz guruşu dahi mücerred otuz sehmi mersûm Zahari yedinden nez‘ etdiğimize binâen malından bize zâmin olsun deyü otuz sehm-i mezkûr bu esnâda iştirâsını mukırra ve mu‘terife iken takrîr-i meşrûhu üzere te‘addî eylediği da‘vâsı müvecceh olmamağla mersûm Zahari zimmîye suâl dahi teveccüh etmeyip mersûme Zoyi Nasrâniyenin kelâmına iltifât olunmadığı İstanbul Mahkemesi’nden huzûr-ı [âlîlerine i‘lâm olundu]. Fî 5 N sene 1222.