İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 125 Hüküm no: 74 Orijinal metin no: [9a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kumaşçı Panayot’a kumaş bedelinden olan borcunu ödemesi hususunda Seyyid Mustafa Ağa’ya tenbihte bulunulması 856 guruş hüküm Ma‘rûz Arzuhâl eden Kumaşçı Panayot v. Atam zimmî meclis-i şer‘-i enverde Sandalcı esnâfından sâbıkā Üsküdar’da Sandalcılar kethudâsı derûn-ı arzuhâlde mezkûrü’l-ism es-Seyyid Mustafa Ağa b. es-Seyyid İbrahim mahzarında mezbûr es-Seyyid Mustafa Ağa zimmetinde bundan akdem yedimden iştirâ ve kabz eylediği akmişe-i mütenevvi‘a-i ma‘lûme semenlerinden lede’l-muhâsebe sekiz yüz elli altı guruş alacağım zuhûr edip hattâ meblağ-ı mezbûr zimmetinde semen-i mebî‘den bana deyn-i sahîhi olduğunu ikrâr-ı kat‘î ile ikrâr ü i‘tirâf dahi etmekle meblağ-ı mezkûru mezbûr es-Seyyid Mustafa Ağa’dan hâlâ taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsını es-Seyyid Salih Ağa b. el-Hâc Mustafa ve Ahmed b. Mahmud nâm şâhideyn-i mu‘addileyn şehâdetleriyle bi’l-muvâcehe ber-nehc-i şer‘î ba‘de’l-isbât mezbûr es-Seyyid Mustafa Ağa şâhidân-ı mezbûrân şehâdetlerinde bi’r-rızâ tasdîk ve kabûl etmeğin mûcebiyle meblağ-ı mezkûr sekiz yüz elli altı guruşu müdde‘î-i mersûm Panayot zimmîye edâ ve teslîme mezbûr es-Seyyid Mustafa Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 3 N sene 1222.