İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 127 Hüküm no: 77 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi İslâm Beşe’nin, fırının tamiri hususunda mülk sahibi Hacı Halil Ağa ile anlaşmaları Vezneciler’de simitçi fırını mâddesi Ma‘rûz İstanbul’da Vezneciler nâm mahâlde bir bâb simitci fırınının beher şehr on üç buçuk guruş kirâ ile müsteciri olup derûnunda mevcûde mu‘teber gedik âlâtına mâlik olan simitçi İslâm Beşe b. Hasan, Çörekçiler Kethudâsı Ahmed Ağa ve fırın-ı mezkûr civârında kâin dekâkin ashâbından es-Seyyid Mehmed Ağa ve Kurâbiyeci Mehmed Ağa ve Muhallebici Yusuf ve Yemenici Ahmed ve sâirleri hâzırûn oldukları hâlde meclis-i şer‘-i enverde fırın-ı mezkûre bâ-temessük-i mütevellî mutasarrıfı olan Merkebçi el-Hâc Halil Ağa b. Ali mahzarında fırın-ı mezkûrun ateş mahâlli olan kubbesi sakat olup derûnunda ateş yandıkça ahşaba alev sirâyetiyle harîk peydâ olmak havfı derkâr olup ol-vechile fırın-ı mezkûrun kubbesi ta‘mîre muhtâc ve mahâll-i mezkûru mülk sâhibi ta‘mîr etmek mu‘tâd olmağla suâl olunup harîk havfından emniyet için fırın-ı mezkûr kubbesini malından sarfla ta‘mîr etmek üzere mezbûr el-Hâc Halil Ağa’ya tenbîh olunmak murâdımdır deyü hâzırûn-ı mezbûrûn ihbârıyla istirhâm eylediğinde mezbûr el-Hâc Halil Ağa dahi cevâbında fırın-ı mezkûrun kirâ-yı kadîmi olan on üçer buçuk guruşu mâh be-mâh bana edâ ve teslîmde cevr ve eziyet etmeyip bilâ-ta‘allül edâ eylemek üzere fırın-ı mezkûrun ta‘mîre muhtâç olan kubbesini malından sarfla ta‘mîr ve termîm etmeğe ta‘ahhüd ve mezbûr İslâm Beşe dahi ber-vech-i muharrer kirâsını bilâ-ta‘allül mâh be-mâh mezbûr el-Hâc Halil Ağa’ya edâ ve teslîme ta‘ahhüd ve kethudâları hâzır bi’l-meclis Ahmed Ağa dahi tekeffül edip ol-vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 18 Şa‘bân sene 1222.