İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 128 Hüküm no: 79 Orijinal metin no: [9b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslişah Sultan Vakfı Mütevellisi Şeyhzade Ahmed Efendi’ye vakıf fırın kirasından olan borcunu ödemesi hususunda Kapamacı Toma’ya tenbih olunması Habbâz fırını Ma‘rûz İstanbul’da Edirnekapısı kurbünde Neslişah Sultan Vakfı’nın hâlâ mütevellîsi eşrâf-ı kuzât-ı kirâmdan Şeyhzâde Ahmed Efendi b. Mehmed Emin Efendi meclis-i şer‘-i enverde zikri âtî sülüs hisse habbâz fırınına vaz‘-ı yedi mütehakkık olan Kapamacı Toma v. Artin zimmî muvâcehesinde mütevellîsi olduğum vakf-ı mezbûr musakkafâtından İstanbul’da Aksaray kurbünde Yusuf Paşa Çeşmesi nâm mahâlde kâin senevî otuz guruş icâre-i müecceleli ma‘lûmü’l-hudûd bir bâb habbâz fırınının sülüs hisse-i şâyi‘ası beher sene on guruş mu‘accele ile bâ-temessük-i mütevellî mersûm Toma zimmînin bi’l-icâreteyn taht-ı tasarrufunda olup senevî icâre-i ma‘lûmesinden işbu târihe gelince on bir senede zimmetinde müctemi‘ olan yüz on guruşu mersûm Toma zimmîden vakıf için bi’t-tevliye hâlâ taleb ederim deyü ba‘de’d-da‘vâ ve’s-suâl mersûm Toma zimmî cevâbında bi-tamamihi ikrâr ü i‘tirâf edip lâkin fırın-ı mezkûr derûnunda müstecirim olan gedik mâliki gāib ani’l-meclis Ömer nâm kimesne müdde‘î-i mezbûra iki def‘ada yetmiş beş guruş verdim deyü gāib-i mezbûr bana ihbâr etmekle icâre-i mezkûreye mahsûb eylesin demesi müvecceh olmamağla kelâmına iltifât olunmayıp bî-vech mu‘ârazadan ba‘de’l-men‘ ikrâr ü i‘tirâfıyla lâzım gelen yüz on guruşu müdde‘î-i mütevellî-i mezbûra vakıf için edâ ve teslîme mersûme Toma zimmîye tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 7 Şevvâl sene 1222.