İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 128 Hüküm no: 80 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa Ağa’nın Balat’ta satın almış olduğu değirmen gediği hissesini Eyüb Çömlekçilerbaşı’ndaki değirmene nakletmesi Balat’da uncu değirmeni Ma‘rûz İstanbul’da Balatkapısı kurbünde Aznavur sokağında kâin üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye mâlik iken bundan akdem vefât eden değirmenci Ahmed b. Abdullah’ın verâseti sulbî kebîr oğulları Ömer ve Hüseyin’e ve sulbiye kebîre kızı Emine’ye münhasıra ba‘dehû mezbûr Hüseyin dahi vefât edip verâseti karındaşları mezbûrân Ömer ve Emine’ye ba‘de’l-inhisâr mezbûr Ömer ile mu‘arrefetü’z-zât mezbûre Emine Hatun’dan her biri meclis-i şer‘-i enverde habbâzân ve uncu esnâfının bi’l-cümle nizâm ustaları hâzır oldukları hâlde hâlâ uncular kethudâsı işbu bâ‘isü’l-i‘lâm es-Seyyid Mustafa Ağa b. Mehmed Emin mahzarında mûrisimiz babamız müteveffâ-yı evvel-i mezbûrdan mevrûs bâlâda muharrer üç horoslu bir bâb değirmen derûnunda mevcûde beyne’l-esnâf gedik ta‘bîr olunur on iki re’s bârgir i‘tibâr olunan âlât-ı lâzıme-i ma‘lûmenin iki horos sekiz re’s bârgir hissesini mukaddemâ gāib ani’l-meclis Atnaş zimmîye semen-i ma‘lûme ve makbûz mukābelesinde bey‘ edip mâ‘ada bir horos dört re’s bârgir hisse-i şâyi‘ası bi’l-irsi’ş-şer‘î yedimizde mülkümüz olmağla biz bir horos dört bârgir hisse-i şâyi‘amızı dahi tarafeynden bi’l-îcâb ve’l-kabûl bâtten ve sahîhan bi-safkatin vâhidetin beşyüz elli guruşa kethudâ-yı merkūm es-Seyyid Mustafa Ağa’ya bey‘ ve temlik ve vech-i lâyıkı üzere teslîm eylediğimizde, ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr beş yüz elli guruşu müşteri-yi merkūm yedinden tamamen kabz ve mesele-i mîrâsımız üzere bi-kadri’l-hısas beynimizde iktisâm edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini kabûlü hâvî ibrâ ve iskāt eyledik, ba‘de’l-yevm bir horos dört re’s bârgirde dahi bizim aslâ ve kat‘a alâka ve medhalimiz kalmayıp merkūm es-Seyyid Mustafa Ağa’nın mülk-i müşterâsı ve hakk-ı sırfı olmuşdur deyü kat‘iyyen ikrârlarını merkūm es-Seyyid Mustafa Ağa ba‘de’t-tasdîk mezbûr es-Seyyid Mustafa Ağa ber-vech-i muharrer iştirâ eylediği bir horos dört re’s bârgirin değirmeni harâb ve akār-ı âhara tebdîl olunmağla Havâss-ı refî‘a kazâsında Çömlekçilerbaşı nâm mahâlde kâin Harâccı Değirmeni demekle ma‘rûf yedinde malı olan bir bâb uncu değirmenine nakl olunmasını iltimâs etmekle esnâf-ı hâzırûn-ı mezbûrûn dahi horoslu nakli şurût-ı nizâm-ı kadîmlerinden olduğunu haber vermeleriyle mârrü’z-zikr üç horoslu değirmenden merkūm es-Seyyid Mustafa Ağa’nın ber-vech-i muharrer iştirâ eylediği bir horos dört re’s bârgir uncu gediğini sâlifü’z-zikr Çömlekçilerbaşı’nda mâlik olduğu Harâccı değirmenine mâlik olup merkūm es-Seyyid Mustafa Ağa üzerine kayd ve kayd-ı atikine şerh verilip yedine sûret i‘tâ buyurulması iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 27 N sene 1222.