İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 135 Hüküm no: 88 Orijinal metin no: [10b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yalova’nın Bayat köyünden vefat eden Osman Ağa’ya koyun bedelinden olan borcunu vârislerine ödemesi hususunda Mustafa b. Mehmed’e tenbihte bulunulması 1000 guruş hüküm Ma‘rûz Anadolu’da Yalakâbad kazâsına tâbi‘ Bayat karyesinde on sene mukaddem vefât eden Elmalık mültezimi Osman Ağa b. Halil’in verâseti zevce-i metrûkesi Ümmühani bt. Halil ile sulbî kebîr oğulları Süleyman ve Hasan’a ba‘de’l-inhisâr mezbûr Hasan husûs-ı âtîde kendiden asâleten ve mezbûrân Süleyman ve Ümmühani taraflarından vekîlleri olmağla vekâleten meclis-i şer‘-i enverde kazâ-i mezbûra tâbi‘ Gacık karyesi ahâlisinden Mustafa b. Mehmed mahzarında babam ve mûrisimiz müteveffâ-yı mezbûr hayûtunda vefâtından üç ay mukaddem malından beher re’si onar guruşdan cem‘an bin guruşa yüz re’s ganemimizi mezbûr Mustafa’ya zikr olunan Gacık karyesinde bi-safkatin vâhidetin bâtten ve sahîhan bey‘ ve teslîm, ol dahi iştirâ ve kabz ve tesellüm edip semen-i mezkûru kable’l-ahz ve’l-istifâ babam mezbûr fevt olup meblağ-ı mezkûr bin guruş bize mevrûs olmağla meblağ-ı mezkûru mezbûr Mustafa’dan bi’l-asâle ve bi’l-vekâle hâlâ taleb ederim deyü ba‘de’d-da‘vâ ve’s-suâl mezbûr Mustafa cevâbında müdde‘î-i mezbûrun verâset ve vekâletini ikrâr, lâkin târih-i mezbûrda mûrisleri müteveffâ-yı mezbûrdan ber-vech-i muharrer ağnâm iştirâ ve kabzını inkâr etmekle müdde‘î-i mezbûr ber-vech-i muharrer müdde‘âsını lede’t-tezkiye adâletleri zâhir olan Mehmed Nuri Ağa b. Ali ve Boyacı Mehmed Beşe b. Osman şehâdetleriyle bi’l-muvâcehe ber-nehc-i şer‘î isbât etmekle mûcebiyle meblağ-ı mezkûr bin guruşu müdde‘î-i mezbûra edâ ve teslîme merkūm Mustafa’ya tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 12 Şevvâl sene 1222.