İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 134 Hüküm no: 87 Orijinal metin no: [10b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Kaptan’a tütün dükkânı gediği bedelinden olan borcunu ödemesi gerektiğine dair Kuyumcu İstefan’a tenbihte bulunulması 511 guruş hüküm. Ma‘rûz Bâ‘isü’l-i‘lâm Mahmud Kapudan b. Ali meclis-i şer‘-i enverde Kuyumcu İstefan v. Serope zimmî muvâcehesinde İstanbul’da Destereciler başında kâin bir bâb tütüncü dükkânı derûnunda mevcûde beyne’l-esnâf gedik ta‘bîr olunur malım olan dokuz mütenevvi‘ kâse ve iki terâzî ma‘a derâhim ve üç havan ve bir peşkun ve bir nuhâs mangal ve sekiz duhân çubuğu ve beş fincan ma‘a zarf ve bir çekmece ve sekiz gözlü bir duhân dolabı ve sâir âlât-ı lâzıme-i ma‘lûmemi işbu sene-i mübâreke Şa‘bânında mahfil-i şühûdda mersûm İstefan zimmîye bi-safkatin vâhidetin bâtten ve sahîhan yedi yüz guruşa bey‘ ve temlik ve teslîm, ol dahi iştirâ ve temellük ve tesellüm edip semen-i mezkûrun yüz seksen dokuz guruşunu bana edâ ve teslîm, ben dahi ahz ü kabz etmemle bâkīsi olan beş yüz on bir guruşu dahi mersûm İstefan zimmîden hâlâ taleb ederim deyü ba‘de’d-da‘vâ ve’s-suâl mersûm İstefan zimmî cevâbında bi-tamamihi ikrâr i i‘tirâf edip lâkin âlât-ı muharrere-i mezkûreyi ber-vech-i muharrer iştirâ eylediğime nâdim ve pişman olmamla geri alıp semen-i mezkûrdan kabzını mu‘terif olduğu yüz seksen dokuz guruşu istirdâd ederim deyü îrâd eylediği vâhî kelâmına iltifât olunmayıp bî-vech mu‘ârazadan ba‘de’l-men‘ ikrâr ü i‘tirâfıyla lâzım gelen semen-i bâkī-i mezkûr beş yüz on bir guruşu müdde‘î-i mezbûra edâ ve teslîme mersûm İstefan zimmîye tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 7 Şevvâl sene 1222.