İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 137 Hüküm no: 90 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gül Cami mahallesi ahalisinin şikâyeti üzerine mahalleden çıkacağına dair Hasan b. Abdullah’ın taahhütte bulunması Mahalleden ihrâç Ma‘rûz İstanbul’da Küçükmustafapaşa’da Gül Câmi‘i mahallesi imâmı es-Seyyid Hafız Ahmed Efendi ve müezzin es-Seyyid Molla Yahya ve el-Hâc Osman Efendi ve es-Seyyid İsmail Ağa ve Mustafa Efendi ve İsmail Efendi ve Kahveci Ahmed Ağa ve Taşçı İbrahim Ağa ve Mehmed Ağa ve Hasan Ağa ve Beşli Ağası Mustafa Ağa ve Kömürcü Mahmud Ağa ve Kömürcü Ömer Ağa ve Ahmed Ağa ve sâirleri meclis-i şer‘-i enverde mahalle-i mezbûre ahâlisinden Hasan b. Abdullah mahzarında mezbûr Hasan mukaddemâ tatlîk eylediği zevcesini câ-be-câ menziline getirdiğinden mâ‘adâ sulbiye kebîre kızı işbu hâzıratü bi’l-meclis zâtı mu‘arrefe Fatıma Hatun’u dahi bu esnâda menziline almağla mezbûrun aralıkda kapısına muhâlif âdemler gelip sû-i mu‘âmele irâdesinde olduklarından bizler dâimâ ta‘cîz ve tekdîr ve havf üzere olup mezbûrûn vücûhla emn ü rahatımız meslûb olmağla mahalle-i mezbûreden hurûcu matlûbumuzdur deyü her biri muvâcehesinde iştikâ eylediklerinde mezbûr Hasan mahalle-i mezbûrede olan menzilinden birkaç gün zarfında hurûc ve mahâll-i âhara nakle müte‘ahhid olduğu bi’l-iltimâs İstanbul Mahkemesi’nden huzûr-ı [âlîlerine i‘lâm olundu]. Fî 12 Şevvâl sene 1222.