İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 137 Hüküm no: 91 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar Sandalcılar Kethudası Seyyid Salih Ağa’ya olan borcunu ödemesi ve eşyasını teslim etmesi hususunda Dimitri v. Yuvan’a tenbihte bulunulması 416 guruş hüküm Ma‘rûz Medîne-i Üsküdar’da Sandalcılar Kethudâsı es-Seyyid Salih Ağa b. el-Hâc Mustafa bi’t-terâzî du‘âhânemizde ma‘kūd meclis-i şer‘-i enverde sandalcı kalfalarından sâbıkā ecîr-i hâssı arzuhâl eden Dimitri v. Yuvan zimmî muvâcehesinde mersûm Dimitri zimmî zimmetinde cihet-i deyn-i şer‘îden altı yüz on üç guruş ve bir destgâh âlâtı semeninden dahi yirmi iki guruş ki cem‘an altı yüz otuz beş guruş ile yedinde olan on iki guruş kıymetli yarım kıyye Flemenk ipliğimi mersûm Dimitri zimmîden hâlâ taleb ederim deyü ba‘de’d-da‘vâ ve’s-suâl mersûm Dimitri cevâbında meblağ-ı mezkûrdan dört yüz on altı guruş deyni olduğunu ve yarım kıyye penbe yedinde mevcûd olduğunu bi-tamamihi ikrâr ü i‘tirâf etmeğin mûcebiyle yarım kıyye penbenin aynını müdde‘î-i mezbûra red ve teslîme ve meblağ-ı sâlifü’z-zikr dört yüz on altı guruşu edâ ve teslîme mersûm Dimitri zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 21 Ramazan sene 1222.