İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 186 Hüküm no: 146 Orijinal metin no: [19a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla İsmail’in, Galata’daki Seyyid Ömer Odabaşı dükkânında bulunan tütüncü dükkânı gediğini Uzun Mustafa’ya satması Galata’da tütüncü gediği Mahrûse-i Galata’da Arabkapısı hâricinde kalafat yerinde câmeşûycu dükkânı karşısında kâin es-Seyyid Ömer Odabaşı dükkânı demekle ma‘rûf Ma‘den kalemi’nde mukayyed mu‘teber gediklerden bir bâb tütüncü dükkânı derûnunda mevcûde beyne’l-esnâf gedik ta‘bîr olunan âlât-ı lâzıme-i ma‘lûmeye tedâvül-i eyâdî ile mâlik olan Molla İsmail b. İbrahim meclis-i şer‘-i münîrde Uzun Mustafa b. Mustafa muvâcehesinde esnâf-ı mezbûre kethudâsı İbrahim Ağa ve Yiğitbaşı es-Seyyid Abdullah Çelebi hâzır oldukları hâlde bâlâda mezkûr bir bâb tütüncü dükkânı derûnunda mevcûde âlât-ı lâzıme-i ma‘lûmeyi bin guruş semen-i makbûza tarafeynden bi’l-hesâb ve’l-kabûl bâtten ve sahîhan merkūm Uzun Mustafa’ya bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan tütüncü dükkânı gediğinde benim kat‘a alâka ve medhalim kalmayıp merkūm Uzun Mustafa’nın mülk-i müşterâsı olmuşdur dedikde, ol dahi tasdîk etmeğin gedik-i mezkûrun merkūm es-Seyyid Ömer Odabaşı ismine mukayyed olan tütüncü gediği kaydı terkīn birle müşteri-yi merkūm Uzun Mustafa üzerine tahrîr ve kayd ve yedine sûret i‘tâ olunmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 3 Zilhicce sene 1222.