İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 188 Hüküm no: 150 Orijinal metin no: [19a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafının talepleri üzere kethudaları olan Süleyman Ağa’nın görevinde bırakılması Dikicibaşı ibkāsı Ma‘rûz Âsitâne-i aliyye ve tevâbi‘i olan Bilâd-ı selâse’de vâki‘ dikici esnâfının on sekiz nefer yiğitbaşısı ve yirmi dört nefer köşe ustası ve sâir bi’l-cümle dikici ustalarıyla Haffâfân Başkethudâsı İbrahim Ağa ile sâir yüz neferden mütecâviz mazbûtü’l-esâmî kimesneler meclis-i şer‘-i münîrde hâlâ berât-ı âlî [19b] Dikicibaşı Süleyman Ağa mahzarında her birleri takrîr-i kelâm edip esnâfımızın ba‘zan müteharrik ve müfsid makūleleri yanlarına birkaç rüfekālar peydâ edip dikicibaşımız mezbûr Süleyman Ağa azl ve ihrâc dâ‘iyesinde olmalarıyla mezbûr Süleyman Ağa’nın etvâr ve harekât-ı marzıyesinden her vechile hoşnûd ve râzılar olup umûr-ı esnâfı dâimâ nizâm-ı kadîmemize tatbîk ile tanzîm ve tesviye ve her ahvâlimizi vikāye etmekle dikicibaşılıkda ibkā olunması matlûbumuzdur dediklerinde merkūmûn tanzîm-i umûrları için merâmlarına müsâ‘ade ve iltimâslarıyla taraf-ı şer‘den kemâ-fi’s-sâbık merkūm Süleyman Ağa dikicibaşılıkda ibkā olunduğu İstanbul Mahkemesi’nden huzûr-ı âlîlerine i‘lâm olundu. Fî 3 Z sene 1222.