İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 189 Hüküm no: 151 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Hıristo’nun Mihal v. Hıristo aleyhindeki alacak davasından men edilmesi Ücret men‘i Ma‘rûz Mübârek Rikâb-ı kamer-tâb-ı hüsrevânîye takdîm-i arzuhâl eden mahrûse-i Galata’ya muzâfe kasaba-i Beşiktaş’da mütemekkin Kürkçü tâifesinden Yorgi v. Hıristo nâm zimmî meclis-i şer‘-i münîrde yine tâife-i merkūmeden Mihal v. Hıristo zimmî muvâcehesinde bundan akdem işbu mesfûr Mihal’e bin yüz seksen üç senesi Muharremi’l-harâmı gurresinden doksan yedi senesi Muharremi gurresine değin beher sene iki yüz elli guruş ücret kavliyle on dört sene müstemirren hizmetim ücretinden zimmetinde müctemi‘ olan üç bin beş yüz guruş ve doksan yedi senesi Muharremi’l-harâmı gurresinden iki yüz dokuz senesi Zilhiccesi gāyetine değin beher sene biner guruş ücret kavliyle on üç sene kezâlik müstemirren hizmetim ücretinden zimmetinde müctemi‘ olan on üç bin guruş ki cem‘an on altı bin beşyüz guruşdan ancak iki bin guruşunu ahz ü kabz edip mâ‘adâ on dört bin beş yüz guruş zimmetinde alacak hakkım olmağla taleb ederim deyü ba‘de’d-da‘vâ ve’l-istintâk, ol dahi cevâbında işbu mesfûr Yorgi zimmî ile bin iki yüz on senesi Muharremi’l-harâmı gurresinde Lonca Odası’nda babam Hıristo hâzır olduğu hâlde ustalar ma‘rifetleriyle ücrete müte‘allik hesâbları sahîhan rü’yet olundukda mersûm Yorgi zimmînin ücretinden bâkī zimmetimizde ancak iki yüz elli guruş alacak hakkı zuhûr etdikde meblağ-ı mezkûr iki yüz elli guruşu mersûm Yorgi zimmînin yedine def‘ ü teslîm, ol dahi ahz ü kabz eyledikden sonra ücret-i mezkûreye ve sâire müte‘allika âmme-i da‘vâdan benim ile babam mersûm Hıristo’nun zimmetlerimizi ibrâ-yı âm ile ibrâ ve iskāt-ı hak etdikde, bizler dahi ibrâ-yı mezkûru kabûl eyledik deyü def‘le mukābele ve def‘-i meşrûhunu Ragovil v. Ligor ve Yanaki v. Mihal zimmîler şehâdetleriyle vech-i şer‘î üzere isbât edip lede’t-tezkiye şehâdetleri makbûle olmağın mûcebiyle müdde‘î-i mersûm Yorgi zimmî husûs-ı mezkûra müte‘allika mesfûr Mihal zimmîye bi-gayrı vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 3 Z sene 1222.