İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 194 Hüküm no: 157 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Mustafa Han’ın Laleli Çeşme’deki imaretleri için un veren Mikâil ve ortaklarının şartları yerine getirmediklerinden unun Ohannes v. Artin’in değirmeninden alınması Uncuların fermân istid‘âsı Ma‘rûz “İşbu takrîre nazar ve iktizâsını i‘lâma himmet eyleyesiz” deyü bu dâ‘îlerine hitâben sâdır olan emr-i âlîlerine imtisâlen nazar olundukda Hudâvendigâr-ı esbak cennet-mekân firdevs-âşiyân merhûm ve mağfûrun-leh Sultan Mustafa Han -aleyhi’r-rahmetü ve’l-gufrân- hazretlerinin binâ ve ihyâsına muvaffak oldukları câmi‘-i şerîf ve imâret-i âmire ve hayrât-ı sâiresinin kāimmakām-ı mütevellîsi Mirâhor-ı evvel-i hazret-i şehriyârî sâbık Şemseddin Bey tarafından vekîlleri ve kethudâları es-Seyyid Abdurrahman Ağa b. es-Seyyid Salih meclis-i şer‘-i münîrde Uncular Kethudâsı es-Seyyid Mustafa Ağa ve nizâm ustalarından Haçok ve Manik ve Toros hâzır oldukları hâlde Laleli Çeşme kurbünde kâin merhûm-ı müşârün-ileyhin imâret-i âmireleri’ne Langa Yenikapısı hâricinde vâki‘ uncu tâifesinden Mikâil ve iki nefer şerîkleri yedlerine beher yevm yirmi sekiz keyl hınta ve hâssü’l-hâs olmak üzere on altı keyl dakīk vermek üzere mesfûrûn ta‘ahhüd eylediklerinden sonra külle yevmin on altı keyl dakīk tabh olunup hademe ve sâir fukarâya taksîm olunmak üzere mersûmûna verilen hıntanın nümûnesine göre dakīk vermedikleri derkâr ve hîleleri âşikâr olduğuna binâen mersûm Mikâil ve şerîkleri olan iki nefer zimmîlerin değirmenlerinde tahn olunmayıp işbu hâzır bi’l-meclis Hocapaşa kurbünde kâin değirmen gediği mutasarrıfı olan Ohannes v. Artin değirmeninde tahn olunmasını müvekkilim mûmâ-ileyhin matlûbudur dedikde, fi’l-hakīka vâkıf-ı müşârün-ileyhin şartı hâssü’l-hâs dakīkden fodula tabh olunup hademe ve fukarâya taksîm oluna deyü şartla meşrût olduğu sûretde mersûmûnun hîleleri zâhir ve nümâyân olmağla mersûm Ohannes dahi şart-ı vâkıf üzere hâssü’l-hâs dakīki i‘tâ, aslâ ve kat‘a taksîrât etmemek üzere ta‘ahhüd edip hâzırûn-ı mezbûrûndan suâl olundukda mersûm Ohannes istikāmet üzere hizmet edeceğini haber vermeleriyle mesfûrûnun değirmenlerinde tahn olunmayıp mersûm Ohannes v. Artin değirmeninden ta‘ahhüdü üzere tahn olunması bâbında emr-i âlîleri sudûru iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 18 Z sene 1222.